7.7 magnitude nga linog nitay-og sa indonesia

MANILA, Philippines — Gitay-og og 7.7 magnitude nga linog ang nasud sa Indonesia kagahapon nga niresulta sa kamatayon sa dili moubos 20 ka mga tawo ug daghan ang nangaangol  ug liboan ang nagkatibulaag tungod sa kalisang resulta sa grabeng pagkaguba sa mga imprastraktura sa mga lugar.

Ang linog diha niigo sa kadagatan duol sa Flores island sa sidlakang bahin sa nasud sa Indonesia, human sa paglinog, niisyu dayun ang gobiyerno og tsunami alert apan gilibkas sab kini dayun paglabay sa pipila ka oras.

Human sa paglinog, nagkara-kara ang mga rescuers sa Indonesia sa search and rescue operation sa nagkalainlaing mga kalungsoran sa isla nga diin usa ka tourist destination sa rehiyon.

Usa sa giatubang nga problema sa mga rescuers gikan sa lagyong mga dapit ang pagkaguba sa mga agianan padung sa mga apektadong mga lugar. Dunay mga dalan nga natabunan tungod sa landslides ug nangaguba nga mga taytayan.

Ang mga residente sa Nagekeo, ang pinakaduol nga lungsod sa sa sentro sa linog, nagiyahay og dagan padung sa mas taas nga lugar  human nila nakita nga nihubas ang dagat sa baybayon nga usa sa mga senyales nga naay umaabot nga tsunami.

Apan human nalibkas ang tsunami warning, gimandoan ang tanang mga tawo nga dili pasudlon sa ilang mga balay tungod kay naa pay mga mahitabong aftershocks nga posibleng makagusbat niini.

Gikan sa paglinog, nakatala na og 12 ka mga aftershocks nga namatikdan nga ang pinakakusog niabot og magnitude of 6.1.