EDITORYAL – Extortion ug blackmail sa China

Ubay-ubay nga mga Chinese nationals nga illegal nga nagtrabaho dinhi sa nasud ang nangadakpan sa mga otoridad sa sagunson nga mga raids sa nagkalain-laing mga planta ug pabrika sa nagkadaiyang lugar sa nasud.

Ning tuiga lang, ubay-ubay nga nga planta sa puthaw ang gipang-ronda sa mga otoridad sa Misamis, Pampanga, Bulacan ug Davao. Ang pagka-parehas aning mga plantaha, gipaluyohan kining ilang operasyon og mga Chinese nationals.

Kadtong ronda sa Philippine Sanja-Steel Corp. sa Misamis Oriental adtong bulan sa Mayo, dunay 69 ka mga Chinese nationals ug usa ka Pilipinong ilang kakunsabo. 

Sa ronda pud sa laing planta sa Davao City nga Davao Mighty Steel (DMS) Corporation ning bulan sa Agosto, 21 ka tawo ang gidakop, apil ani ang napulo ka Chinese nationals ug upat ka Pinoy nga mga local incorporators ug 174 ka Filipinong trabahante ang naluwas.

Sa operasyon sab didto sa Chuangxing Steel Inc. sa Pampanga, unom ka Chinese nationals sab ang gidakop ug gipahunong ilang operasyon. Ang unom dunay Alien Employment Permits apan tungod sa ilang substandards nga produkto gibakwi kini sa Department of Labor and Employment (DOLE).     

Gawas sa kalapasan sa Immigration Laws ug Labor Laws tungod kay wala silay mga work permits ug uban pang permits, nadiskubrehan sad nga ang ilang mga produkto gikan aning mga plantaha pulos mga substandard  ang mga kabilya nga ilang hinimo.

Nadiskubrehan sab nga naay peligrosong radioactive isotopes sa mismong mga planta ug sa ilang mga produktong rebars human nainspeksyon sa Philippine Nuclear Research Institute (PNRI) sama sa Uranium-238 ug Thorium nga pulos maka-kanser ug uban pang balatian sa panglawas.

Kaning pagdakop kanila, wala ikahimuot sa gobiyerno sa China. Ning bag-o lang, ang Chinese Foreign Ministry mipahibalo nga sobra 100 ka mga Pilipinong nagtrabaho didto sa China ang ilang gipangdakop tungod daw sa illegal nga pagpuyo ug pagtrabaho didto.

Giisip kini ni Defense Secretary Gilbert “Gibo” Teodoro nga usa ka matang sa extortion ug blackmail. Murag gibuhat lang ni sa China para makabawos o ipiton ang Pilipinas.

Ang pagdakop sa mga Chinese diri nag-agi sa legal nga proseso ug naay warrants ug naa gyuy mga kalapasan. Ang mga Pinoy didto sa China, unsa kahay ilang salaod didto?