Dili maantigo molangoy

Gikwestiyon sa mga environmental ug community groups ang bag-ong kasibot ni Presidente Marcos, Jr., sa pagduso sa waste-to-energy (WTE) inceneration isip tubag sa kagamhanan sa suliran sa basura ug baha sa Metro Manila.  Kinaiya sa mga kritiko nga mosaway sa kagamhanan, apan ‘ni’ng suliran ug sulbad sa basura, angay panaminan usab nga sa laing modernong mga nasud, dugay na’ng gisagop ang inceneration isip sulbad sa pagdumala sa basura. Kay kritiko man, sayon ra nila sagupon ang argumento nga, “Milakaw si Hesukristo sa tubig kay dili man Siya maantigo molangoy.” Madahaan!

Mo-sideline og paninda

Gisaway sa Alliance of Concerned Teachers (ACT) ang Department of Education tungod sa giingon pagpunay lang og padangat og mga “reminders” ngadto sa mga magtutudlo sama pananglit sa  pag-awhag kanila sa dili paggamit sa ilang ATM isip loan collaterals.  Alang sa ACT, angay tubagon ang suliran karon sa mga magtutudlo nga mao ang kaubos sa sweldo.  Sa kahimtang karon sa mga maestra, halos dili na gani makapalit si Maam og make-up ug dili na makabayad sa order nga parcel. Matud pa bitaw, “Aron makalahutay, mo-sideline na lang ‘tawon si Maam pagpaninda’g ice candy ug nilapwaan’g itlog.” Fezteleern!

Rebelde himoon’g mag-uuma

Nagtambayayong ang Department of Agriculture (DA) ug ang Office of the Presidential Adviser on Peace, Reconciliation and Unity (Opapru) aron pag-umol og usa ka livelihood program nga maghimo’ng mag-uuma sa mga kanhi rebelde pinaagi sa pag-integrate sa mga kanhi MILF rebels ngadto sa plantation-style agriculture.  Kon molampus ang maong programa, dili na armas ang gunitan sa mga rebelde kon dili himan na sa pagpanguma. Sugyot sa akong amigo, “Maayo tingale apilon ang uban’g mga empleyado sa Airport niining programaha kay maayo man kaayo to sila mananom og bala (tanim-bala) sa bagahe sa mga pasahero.” Ateerr!

Wala pa’y nasugdan

Matud pa ni Presidente Marcos, Jr., kinahanglan nga ipadayon ang iyang anti-corruption drive human sa iyang termino aron maseguro nga ang mga reporma ug kausaban nga nahimo sa kagamhanan masustenihan.  Adunay nag-ingon nga dakong baligho ang maong panawagan sa presidente tungod kay gihulawagway man kining kasamtangan’g administrasyon nga maoy labing corrupt. Matud pa bitaw sa mga kritiko, “Kon aduna pa’y anti-corruption drive, ngano’ng wala pa ma’y napriso sa mga mastermind.  Busa walay angay ipadayon kay wala pa ma’y nasugdan.” Muleeng!

Kinsa’y maayo’g serbisyo

Gitataw sa MWCD nga dili sila mosupak sa aplikasyon sa Worlds First Water Ventures Inc. nga moserbisyo ug mosuplay og tubig sa mga bukiran’g barangay sa Cebu City apan ubos  sa kondisyon nga gilatid sa MCWD.  Sagad nga kon adunay kompetisyon sa serbisyo, ang katawhan maoy mabulahan.  Busa angay nga katawhan maoy mohukom kon kinsay maayo mohatag og serbisyo tali sa duha.Makapahinumdum sa usa ka bayot nga sa dihang gipangutana kon kinsay iyang ganahan tali sa iyang duha ka uyab nga si “A” ug si “B”, midapig siya kang “B” kay matud pa niya, “Gawas nga barato ra si “B”, mobawos pa gyud og dili ra magpatarâ.” Pagkatoytoy!