Saksak Sinagol

Basaha: Mt. 13;47-33

Kining maong ebanghelyo naghisgot sa pagkaaksak sinagol sa mga isda nga nakuha sa baling ingon man ang mga bag-o ug daang mga butang sa usa ka panimalay. Kini ang matang sa paghulagway sa gingharian sa Dios. Nga ang katukoran sa Gingharian sa Dios dili lang diay mahitungod sa mga maayo ug mga balaang mga tawo kondili naglakip usab kini sa sa mga masalaypon ug kanila nga mga inihid ning atong katilingban.

Apan bisan pa man sa maong kalainan kun panaglahi wala man kini magpasabot nga ang matag usa walay matampo alang sa katukoran sa Gingharian sa Dios. Mao bitaw nga ang natukod nga Gingharian sa Dios nagdapit kanato sa pagpili kun kinsa ang atong hari o kinsa ang atong himoong sukaranan diha sa atong panaw sa kinabuhi. Ang kalibutanon ba o ang langitnon? Ang kangitngit ba o ang kahayag?

Ang birtud ba o ang sala?

Apan bisan pa man kun nahiapil ang mga masalaypon atong hinumdoman nga ang ilang kahuyangan mamahimong mahulipan og kabalaan. Kini tungod kay every saint has a past and every sinner has a future. Kitang tanan bisan pa man sa atong kagahapon ug kagikan ang managsamang nahatagan og kahigayonan aron himoong tul-id ang dalan nga atong pagasubayon.

Ug kun bisan pa man kun dili maayo ang atong mga kagahapon apan wala kini magpasabot nga mahilansang kita niini. Kun giutingkay sa tag-iya sa balay ang tanang mga butang sa iyang tipiganan mga bag-o man o daan, nagpasabot lamang kini nga buot sa Dios nga lainon ang mga butang nga makaayo alang kanato gikan sa mga butang o pagbati o panlantaw nga makadaut kanato.

Saksak sinagol man tuod ang atong kinabuhi ingon man atong ma baruganan apan wala kini magpasabot nga sa Dios kita gipasagdan.