Lima ka lalaki nakuhaag armas
CEBU, Philippines — Lima ka mga lalaki ang nangapriso tungod paghupot og illegal nga armas human sa lain-laing operasyon sa Cebu City Police Office (CCPO) sa kaadlawon sa Biyernes, Hulyo 31.
Matud sa CCPO, ang mga operasyon gipahigayon sa kapulisan sa Parian, Carbon ug Guadalupe Police Stations, inubanan sa City Intelligence Unit (CIU).
Ang tanang nangadakpan kasohan og paglapas sa Republic Act No. 10591 o ang Comprehensive Firearms and Ammunition Regulation Act.
Sa Barangay Guadalupe,nitubag sila og alarma kabahin sa usa ka armado nga lalaki. Nakuha gikan sa suspek ang homemade .9mm revolver nga adunay usa ka bala.
Duha usab ka mga lalaki ang nasikop sa Carbon Police Station sa Barangay Pahina Central ug Kalubihan atol sa Simultaneous Anti-Criminality Law Enforcement Operations (SACLEO).
Pareho silang nakuhaan og .22-caliber revolvers nga adunay tagsa ka bala. Samtang, usa pa ka suspetsado ang nadakpan sa mga operatiba sa City Intelligence Unit sa Sitio Caimitohan, Barangay Sapangdaku nga nakuhaan sa og .9mm revolver nga adunay tulo ka bala.
Sa Barangay Lorega San Miguel, usa usab ka lalaki ang nasikop sa Pari-an Police Station atol sa Oplan Bulabog diin naaktohan ang lalaki nga naghupot og usa ka .38-caliber revolver nga adunay duha ka bala. (BANAT NEWS)
- Latest
