Work from home

Labaw sa Katunga sa 24 ka senador ang wala motambong sa ika-5 nga State of the Nation Address (Sona) ni Presidente Marcos, Jr.  Sa habig sa minoriya, si Senador Camille Villar lang ang mitambong samtang sa habig sa mayoriya, 3 ka senador usab ang wala motambong.  Nagkadaiyang rason ang gipadangat sa mga mi-absent, adunay morag tinuod ug aduna usa’y morag binotbot lang. Matud pa sa usa ka kritiko, “Nagkalisod na gyud tinuod ang atong nasud, kay nakahukom man ang ubang senador nga mag-“work from home” bisan sa kamahinungdanon unta sa SONA.”  Madahaan!

Kakulang sa sulbad

Segun sa survey nga gipahigayon sa bag-ong na-establisar nga public opinion research firm Momentum Research, nasayran nga 90% sa mga Filipino ang wala matagbaw sa gibuhat sa presidente pagsulbad sa flood control kurapsyon.  Buot ipasabot nga 1 lamang sa 10 ka Filipino ang nakauyon sa gibuhat sa presidente sa pagsulbad sa maong anomaliya. Matud pa sa akong silingan, “Aaw, klaro na nga kanang 10%, nakapahimulos sa anomaliya sa flood control projects mao nga uyon sila nga dili tarongon ang imbestigasyon.”  Muleeng!

Libayano’ng motaral

Usa ka adlaw human gipahigayon ang SONA, namahayag gilayon ang Ombudsman nga libyano ang ilang buhatan ng motaral niadtong may tulobagon sa anomaliya sa flood control, bisan pa niadtong mga suod o paryente sa presidente.  Mahinumduman nga bisan gihisgutan na kini’ng maong anomaliya sa presidente sa iyang SONA sa miaging tuig, hangtud karon wala pa’y napasaka nga kaso ang Ombudsman batok kang Former Speaker Romualdez. Mao kana’y giingon nga, “Hinambog ra man kini sa Ombudsman kay kon libyano silang mopasaka og kaso, nan, libyono ra usab sila nga dili mopasaka og kaso.”  Paleho laa!

Matinahuro’ng sugyot

Naglaum si Cebu City Councilor Jun Alcover nga mahatagan sa Konseho og pagtagad ang nagkadako nga kahingawa sa kapakyas sa mga establisyemento sa pagbutang og mga priority lanes alang sa mga senior citizens ug mga persons with disabilities (PWDs).  Matud pa ni Alcover, atol sa iyang privilege speech, ang maong mga priority lanes dili lamang kurtesiya kon dili gimando gayod sa balaod alang sa kasayon sa mga senior citizen ug mga PWD’s.  Hinaut nga mahatagan na gayud kini’g pagtagad. Kay matud pa bitaw, “Ang balaod nga walay tinud-anay nga pagpapatuman, nahisama lang sa usa ka matinahuron nga sugyot gikan sa usa ka politiko.”  Fezteleern!

Bah? ug hugaw ang basura

Gikwestiyon ni Cebu City Mayor Nestor Archival kon ngano’ng nagdumili ang Binaliw landfill pagdawat sa basura nga hinakot sa Cebu City government, samtang padayon kini nga midawat sa basura gikan sa mga pribadong haulers.  Daghan ang atong mahunahunaan nga rason niining pangutana sa mayor kabahin ni’ng wala una pagpakiglambigit sa Binaliw landfill sa dakbayan: mahimong kurapsyon, mahimo usab nga naghinobrang pagpamolitika sa isyu ug mahimo usab ang kalangayan mobayad sa LGU. Apan alang sa akong palahubog nga silingan ang rason kuno maong dili palabayon kay, “Bahô ug hugaw ang basura sa dakbayan.”  Pagkatoytoy!