Sa hilom nga paagi

Basaha: Mt. 13; 31-35

Matud pa sa mga teologo nga ang Gingharian sa Dios kuno anaa na apan wala pa.

Anaa na sanglit mao man kini ang proyekto sa atong Ginoong Jesus niadtong naghimo pa siya sa iyang public ministry.

Wala pa tungod kay anaa pa kini sa proseso sa kahingpitan.

Ug ingon nga mga bahin sa iyang lawas buot niya nga manginlabot kita sa maong programa.

Gihulagway sa Ginoo ang Gingharian sa Dios ingon nga usa ka liso sa mustasa.

Nagsukad ingon nga liso apan sa paagi nga wala nato hisabti ang nitubo ug nahimong dakong kahoy aron ang mga langgam modangop sa iyang mga sanga.

Kini nagpasabot lamang nga diha diay sa ginagmay ug yanong mga pamaagi mahimo kitang makatampo sa kawsa sa Dios.

Kini tungod kay wala lang siya manghinan-aw hinunoa nagdasig siya kanato aron motampo. Motampo ang tawo aron ang Diosnong mga pulong mas masabtan ug higugmaon sa paagi nga tawhanon.

Sa laing bahin atong hinumdoman nga gikinahanglang atong huboan ang atong mga kaugalingon gikan sa mga bisti sa mga pangutana ug pagduda gikan sa Dios.

Gikinahanglan nga atong itugyan ang atongkaugalingon sa proseso nga gilatid sa Dios. Diha sa hilom nga paagi atong sination ang grasya sa Dios ug diha sa hilom nga paagi kita molihok aron paghimaya sa Dios.