DOH: Kaso sa COVID-19 nagpabiling ubos

CEBU, Philippines — Gitaho sa Department of Health (DOH) nga nagpabiling ubos ang mga kaso sa COVID-19 sa Pilipinas, diin mikunhod og 70 porsiyento ang mga kumpirmadong impeksiyon kumpara sa susamang panahon sa niaging tuig.

Sa pamahayag nga gipagawas niadtong Biyernes, Hulyo 17, giingon sa DOH nga adunay kinatibuk-ang 1,532 ka kumpirmadong kaso sa COVID-19 nga natala sa tibuok nasud gikan Enero 4 hangtod Hulyo 11, 2026.

Matud pa sa DOH nga mas ubos kini kumpara sa 5,070 ka kaso nga natala sa susamang panahon niadtong 2025. Wala pa usab makahatag og datos ang DOH-Central Visayas kung pila sa mga kumpirmadong kaso sa COVID-19 ang natala sa rehiyon sulod sa maong panahon karong tuiga.

Matod sa DOH, nagpadayon kini sa hugot nga pagmonitor sa kahimtang sa COVID-19 pinaagi sa mga regional office ug local government units (LGUs), samtang gipadayon usab ang disease surveillance ug mga mekanismo sa pagtubag batok sa sakit sa tibuok nasud.

Lakip sa kasagarang mga sintomas mao ang hilanat, pangurog, sakit sa tutunlan, ubo, sip-on o baradong ilong, labad sa ulo, kakapoy, pananakit sa kaunoran, lisod nga pagginhawa, kasukaon, pagsuka, kalibanga, sakit sa tiyan, ug pagkawala sa panglasa.

Bisan pa sa ubos nga gidaghanon sa mga kasong natala, giawhag sa DOH ang publiko nga magpadayon sa pagsunod sa yano apan epektibong mga pamaagi aron mapugngan ang pagkaylap sa COVID-19 ug uban pang mga sakit sa respiratoryo.

Lakip niini ang kanunay nga paghugas sa kamot gamit ang sabon ug tubig, pagtabon sa baba ug ilong kon moubo o mohatsing, ug pagmintinar sa husto nga personal nga kalimpyo. (BANAT NEWS)