EDITORYAL — Pagkutya sa mga Pilipino
HINDI na ito biro. Kapag ang isang state-run media outlet tulad ng China Daily ay naglalabas ng video na naglalarawan sa mga Pilipino bilang unggoy, ibang usapan na. Hindi iyon journalism. Hindi iyon diplomacy. Racism iyon.
Sa nasabing AI-generated video, ipinakita ang isang monkey-like figure na nakasuot ng barong at salakot, itinutulak umano ng U.S. at Japan, at kalaunan ay itinapon sa dagat at binomba ng water cannon. Malinaw ang gustong iparating: minamaliit ang Pilipino, kinukutya ang ating paninindigan sa West Philippine Sea, at pinalalabas na wala tayong sariling isip sa pagtatanggol ng karapatan. Dito dapat malinaw ang sagot: hindi tayo puppet dahil ipinagtatanggol natin ang atin.
Matagal nang sinusubukan ng China na balewalain ang 2016 Arbitral Award na kumilala sa karapatan ng Pilipinas sa West Philippine Sea at nagbasura sa malawak na claim ng Beijing. Pero hindi mabubura ng cartoon, AI video, o racist propaganda ang desisyon ng international tribunal. Hindi rin nito mababago ang katotohanang may mga Pilipinong mangingisda, sundalo, at coast guard personnel na araw-araw na humaharap sa panganib sa sariling karagatan.
May pinagkaiba ang satire sa racism. Ang satire ay pumupuna sa kapangyarihan. Ang racism ay nangmamaliit ng lahi at pagkatao. Kapag ang isang bansa ay kinukuwestiyon sa batas at ebidensiya, hindi dapat ang sagot ay pang-iinsulto. Kung matibay ang posisyon ng China, dapat nitong ipagtanggol iyon sa legal at diplomatic na paraan, hindi sa paglalarawan sa ibang lahi bilang hayop.
Mahalaga ring sabihin: ang galit na ito ay hindi laban sa ordinaryong Chinese people. Maraming Chinese, Filipino-Chinese, at iba pang mamamayan ang walang kinalaman sa propaganda ng isang state media outlet. Ang dapat kondenahin ay ang racist messaging, ang pangmamaliit, at ang paggamit ng propaganda para takpan ang kawalan ng respeto sa karapatan ng Pilipinas.
Sa isyung ito, hindi dapat magkanya-kanyang kampo ang mga Pilipino. Hindi ito tungkol sa pagiging maka-Amerika, maka-China, pro-administration, o opposition. Kapag ang Pilipino ay inilalarawan bilang unggoy, buong bansa ang iniinsulto. Kapag pinalalabas na wala tayong sariling isip, buong bansa ang minamaliit.
Tama lang na manawagan ang DFA, DND, at mga mambabatas na tanggalin ang video at humingi ng paumanhin ang China Daily. Ang ganitong uri ng propaganda ay hindi dapat palampasin, dahil kapag hinayaan, nagiging normal ang pangmamaliit.
Hindi mabubura ng racism ang ating karapatan sa West Philippine Sea. At hindi mapaliliit ng anumang video ang dignidad ng Pilipino.
- Latest
