Smoke belching

Gimandoan sa Cebu City Traffic Management Board ang Cebu City Transportation Office (CCTO) nga molusad na usab og pagpanakop sa mga motorsiklo nga saba kaayo og tambutso.

Maayo kay di man gyud maayo kining mga motorsiklo nga maghatag lang og kasaba, ug ang mga tag-iya niini maghinambog nga kusog ang tingog sa ilang motor bisan hinay ra modagan.

Dunay motor, gikadungan nako sa eskina sa Echavez Street ug nagpaabot mi sa GO signal, saba kaayo ang iyang tambutso, pag-GO signal na, nagka-utot-utot man lagi og gukod nako.

Wa gyud kini makaapas hangtud sa sunod eskina dapit sa Ayala. Dili ang kasaba maoy sukdanan kon kusog ba ang imong sakyanan, sukdanan hinuon na sa kagaraon sa nag-drive.

Samtang nalipay ko kay gimandoan sa Cebu City Traffic Board ang mga traffic enforcers nga manakop sa mga sakyanan nga saba kaayo’g tambutso, nasubo ko kay wa man sila momando nga kampanyahan ang mga sakyanan nga nagbuga og itom nga aso.

Pangutan-on nako ang mga sakop sa Traffic Board sa Cebu City nga gipangulohan ni Atty. Koko Holganza, wa mo makabantay nga pwerteng daghana na sa mga sakyanan nga nagdagan og nagbuga og itom kaayong aso?

Ari mo pag-atang sa Gorordo Avenue dapit sa UP, ug balhin mo sa Veterans Drive patungas sa Marco Polo Hotel, daghan gyud mo og madakpan kon ayuhon lang gyud ninyo pagpanakop.

Nganong wa na man mohimo’g operations niini ang CCTO? Ayaw na lang mo paghuwat nga ang mayor ang momando sa mga traffic enforcer kay basin nakalimot na si Mayor Nestor Archival nga usa siya ka environmentalist.

Magpangagot ang akong bag-ang kon makakita sa mga sakyanan, sagad PUJ nga magbuga og itom kaayong aso.

Ang mga tag-iya niining mao nga mga sakyanan ang pagkumkom lang sa kinitaan sa ilang mga driver ang anaa sa ilang utok.

Wa gyud ni sila magtan-aw nga ang ilang mga PUJ nakamugna og kadaot sa panglawas sa katawhan nga makahanggab sa itom kaayong aso gikan sa makina sa ilang mga depektoso na nga sakyanan.

Dunay ordinansa ang Cebu City government nga magpahamtang og silot sa mga tag-iya og sakyanan nga masakpang nagbuga og itom ug makadaot na nga aso.

Apan mag-unsa man ang balaod kon dili ipatuman sa atong mga tigpatuman sa balaod? Ayaw ko’g ingna nga ang mga traffic enforcers wa makakita nianang mga PUJ nga nagbuga og itom kaayong aso?

Bisan sila si Atty. Koko Holganza ug si Mayor Archival nakakita gyud tingali sab, apan nagpakabuta-bungol lang niini nga isyu!