Better Rivers PH sa SMC gipalapdan dinhi sa Cebu

CEBU, Philippines —  Gipalapad sa San Miguel Corporation (SMC) ang dugay na nilang Better Rivers PH initiative dinhi sa Cebu, pinaagi sa opisyal nga paglusad sa dako nga operasyon sa pagpanglimpyo sa Butuanon River sa Mandaue City isip kabahin sa mga lakang aron maminusan ang baha ubos sa programa nga Oplan Kontra Baha sa gobyerno.

Si SMC Chairman ug Chief Executive Officer Ramon S. Ang miingon nga ang kompanya nagpadayon sa maong cleanup nga walay gasto sa gobyerno, ug gikutlo ang kakulian sa pagbaha nga nakaapekto sa mga komunidad.

“Mandaue has long been home to San Miguel and to generations of our employees, and we are glad to support the government in this effort to help reduce flooding and protect communities,” matod ni Ang sa usa ka press statement.

Ang proyekto magtutok sa upat ka kilometro nga bahin sa Butuanon River gikan sa baba paingon sa upstream nga mga lugar, nga grabeng naapektuhan sa siltation ug tapok sa basura nga nakapakunhod sa agos sa tubig paingon sa Mactan Channel.

Ang suba kabahin sa mga waterways nga miawas atol sa Bagyong Tino niadtong Nobiyembre 2025, diin ang kusog nga ulan nga mas labaw pa sa usa ka bulan nga tipunon nga pag-ulan ang hinungdan sa grabeng pagbaha sa tibuok Mandaue City.

Ang maong inisyatiba gipatuman kauban ang DPWH nga nangulo sa Oplan Kontra Baha, ug ang Lokal nga Gobyerno sa Mandaue City.

Miingon ang SMC nga ang kahimtang sa Butuanon River parehas sa ubang mga suba nga ilang na-rehabilitate na, diin ang natapok nga silt ug basura nakapakunhod sa gilapdon ug                        giladmon sa mga waterways.

Ang San Miguel Brewery Inc. (SMBI), nga nag-operate sa SMB Mandaue Brewery, motabang sa operasyon pinaagi sa pagdeploy og dili mokubos sa unom ka excavator ug daghang barge aron tangtangon ang silt, basura, ug yuta sa tibuok suba.

Ang paglunsad nga gihimo niadtong Huwebes sa Eco Learning Center sulod sa San Miguel Eco Park sa Mandaue, gitambongan sa mga opisyal gikan sa nasyonal ug lokal nga gobyerno, apil si Mandaue City Mayor Thadeo Jovito “Jonkie” Ouano, Mandaue City Lone District Representative Emmarie Ouano-Dizon, DPWH Undersecretary Charles Calima, ug mga representante sa DENR ug SMC business units.

Kauban usab sa aktibidad si SMC Vice President ug Better Rivers PH Overall Project Manager Jimmy O. Lu, SMBI Plant Manager Villamor Tuazon, ug ubang opisyal sa kompaniya.

Samtang gisalmotan sa laing-laing agensya sa gobyerno ang gihimong “Panaghiusa sa Baybayon, Panalipod sa Kadagatan” coastal cleanup diha sa SRP kagahapon Hunyo 20.

Kini gitumong aron maprotektahan ang marine resources ug pag-promote sa environmental awareness.

Naghiusa ang mga kawani sa gobyerno ug mga volunteers sa pagpang limpyo sa coastal areas lakip na ang pagpanguha og basura.

Giklaro sa mga opisyales nga ang pag protehir sa kadagatan usa ka responsibilidad nga nagkinahanglan og kooperasyon sa tanang sektor sa katilingban.(BANAT NEWS)