Makapa-kublan batok sa kaso

Daghang mga pundok, lakip na ang Samahan ng Progresibong Kabataan (SPARK), ang miawhag sa Ombudsman nga tumanon niini ang saad nga pasakaan og kaso’ng kriminal si Senator Joel Villanueva, tungod kay hinog na kini nga isang-at sa hukmanan.  Daw nahilom man ang Ombudsman sa dihang mitabok si Senador Villanueva sa pundok ni Gatchalian. Makapa-kublan diay  batok sa kaso kon mobalhin ang senador sa pikas kampo.  Nahisama man kini sa dula sa mga bata nga “seb-sebay”. Hapit na unta madakpan ang Senador, apan nakatunob pa gyud kini sa base sa kontra dayon singgit nga “seeeb” (Save)”.  Atala lagee!

Sa basement napunta

Segun sa ulahing survey sa Social Weather Station (SWS) nga gipahigayon niadtong Marso 2026, nakakuha na lang og  -13 net satisfaction rating ang administrasyon ni Presidente Marcos, Jr., nga giingon nga labing ubos sa iyang administrasyon.  Nagkadaghan na ang dismayado sa sa kasamtangan’g administrasyon. Nagpasabot kini nga ang mga gimithi nga tingusbawan ug panginahanglan sa katawhan wala makab-ot ug matubag sa atong pamunoan. Matud pa sa palahubog, “Tuyo man unta kab-oton sa administration ang ika-15 nga andana sa satisfaction rating, apan dakong baligho, kay sa basement man hinoon sila napunta.”  Madahaan!

Krimen ang pagbutyag

Adunay nadiskobrehan ang Department of Agriculture human sa ilang gipahigayon’g monitoring exercise, nga adunay posibleng mislabeling nga gihimo sa mga rice traders, diin ang mga imported nga bugas ilang hinganlan nga local variety aron mapresyohan og mas mahal.  Dugay na man kini nga modus sa mga rice traders.  Usahay gani sagolon pa ang mimis nga bugas sa mga dugmok, apan ibaligya gihapon sa mahal nga presyo.  Daghan ang nagtoo nga kunsabo ang mga awtoridad ni’ng maong modus maong milahutay kini. Haum ang panultihon nga “Kon ang mananakop maoy naghimo sa krimen, mas dakong krimen ang pagbutyag kanila.”  Muleeng!

Mobayad apan dugay

Gipahibawo sa Department of Social Welfare and Development (DSWD) nga dawaton na sa pipila ka pili’ng mga sanga sa Generika Drugstore ug Mercury Drugstore ang guarantee letter nga gi-isyu sa maong ahensya nga magamit sa mga AICS beneficiaries aron makakuha og serbisyo sama sa medical ug burial expense.  Maanindot ang maong programa sa DSWD ug hinaut nga i-simplify ra ang requirements sa pag-avail niini.  Apan base sa kasinatian, “Basta gobyerno gani ang mogarantiya, segurado man nga mabayran, apan di lang segurado kon kanus-a.”  Fezteleern!

Order nga walay bayad

Namahayag si Cebu City Mayor Nestor Archival nga adunay igong pundo ang dakbayan alang sa sweldo sa mga Job Order (JO) nga empleyado sa city hall apan nalangan lang ang paghatag sa ilang suholan tungod sa procedural requirements nga kinahanglang tumanon labi na ang City Council approval.  Inay magbinasulay, angayan nga magsabot ang atong mga opisyal aron mahapsay kining maong suliran. Matud pa sa usa ka kritiko, “Kon dili kini nila sulbaron dayon, wala silay kalainan sa mga bagis sa imnanan nga magpunay lang og “order” sa tindera pero walay bayad-bayad.”  Pagkatoytoy!