Maayong ideya

Giplano karon sa mga opisyal sa Mandaue City nga mopalit ang siyudad og Super Drone nga magamit sa kabomberohan pagpawong sa sunog nga moulbo sa tag-as nga mga building.

Moderno kini nga kahimanan nga gihimo na sa ubang kanasuran nga ang Super Drone, tauran og hose sa bombero ug makalupad og labing menos 100 meters gikan sa ubos.

Kon tua na sa taas ang Super Drone, makahimo kini pagliwag-liwag pinaagi sa pagkontrolar sa mag-operate niini nga anaa ra sa ubos kon asa ang dapit nga pasiritan og tubig.

Tan-aw nako, dako kini og matampo nga mapawong dayon ang sunog kay ang nasinati nato pagka karon nga kon ang sunog adto moulbo sa mga tag-as nga andanang building, maglisud ang kabomberohan pagpawong.

Tinuod, dunay mga “dry fire hydrant” ang mga building, kay requirement na man kini sa paghimo og high-rise structure, apan daghan niining mga dry fire hydrants wa gamita kon may sunog.

Gani ang uban niini dili na magamit kay dunay mga tawo nga way kasayuran unsay kagamitan niini, kay ang ang ubang entrada sa dry fire hydrant nga anaa sa silong, paslakan og mga upos sa sigarilyo ug mga bato.

Pero midayeg ko ni Mayor Jonkie Ouano ug sa ubang opisyal sa Mandaue kay nakahunahuna niini. Diri sa Cebu City mora’g wa sila niini makahunahuna nga unta, dia sa Cebu City ang mas labing daghan nga tag-as kaayong building.

Bisan ang mga trak sa bombero nga dunay ladder, dili makaabot sa habog kaayong mga building nga ang uban mosubra gani sa 50 ka andana.

Dinhi sa Cebu City, angay na unta karon nga tagdon na ang atong kasapaan, palawman ug palapdan, aron nga kon moabot na sab ang tinguwan, malikayan na ang paglunop.

Mora’g tan-aw nako wa magpakabana niini si Mayor Nestor Archival, kay kada agi nako nianang sapa nga milagbas sa Sikatuna Street ug modugtong sa T. Padilla River, puno gihapon sa mga lapok ug sagbot.

Ang Estero de Parian (Parian Creek) kining tupad ra gyud sa The Freeman building, mabaw kaayo kay napuno sa mga lapok, ug mao nga kon mag-uwan, maglunop gyud dihang dapita, ilabi na sa Manalili Street.

Tungod tingali sa kadaghan na sa giatiman ni Archival, dili na siya makaato sa pag-atiman sa mga gimbuhaton, ilabi na nga bisan ang gagmay kaayong imbitasyon, sama sa cutting of ribbon, iya gyud nga adtoon.

Tan-aw nako wa magsilbi ang pagka-environmentalist ni Archival kay wa niya maatiman ang daghang gimbuhaton.

Anugon ang pangagpas sa uban nga nindot kuno nga ang mayor usa ka engineer, apan wa gihapon kini kapuslanan.