Kinsa ang labing kabus?  

Nahimong complain sa kadaghanan nga daghan ang naglisod. Daghan ang nagindahay nga mamahimong hayahay ang ilang kinabuhi ug mamahimong Seguro ang tanan alang kanila.  Ang kasinatian sa pagkakabus nagpasabot man nga anaa ang kakulangan. Ang maong kasinatian sa kakulangan naghupot man og nagkadaiyang dagway.

Tinuod nga lisod ang mamahimong kabus. Apan mas dakong kalisdanan kun daghanan kanato agn walay igong katagbawan.

Ang walay katagbawan mao kadtong nakahupot sa mga butang, kasikat ug gahum apan padayon gihapon sa pagpangita niini.

Pabilin silang walay katagbawan. The more sila makakupot sa butang the more nga dili nila kini buhian nga maoy niresulta sa ilang pag-antos sa hilabihan.

Sama pananglit sa usa ka unggoy. Ang unggoy kun ibutang niya ang iyang kamot sa lungag sa bagol diin dunay pagkaon didto, ang mahimong mabilanggo niini tungod kay magdumili man siya sa pagbuhi sa maong pagkaon.

Ang iyang kahilig sa pagkaon ug bisan unsa nga nakuptan sa iyang kamot ang nakapahimo niyang madakpan nila nga buot modakop kaniya.

Dunay mga tawo nga yutaan na unta apan padayon gihapong manlupig sa uban aron mas madugangan ang ilang kayutaan. Daghan sila og kabtangan apan wala silay silingan. Nagpaila lamang kini nga dili garantiya ang kiaadunahan aron ikaw tahuron. Mahimo tingali nga ikaw kahadlokan apan dili higugmaon o tahuron.

Ang sekreto nga ikaw mamahimong tinuod nga dato mao man ang pag-angkon nga ang tanan lumalabay lamang ug dunay kinutoban. Ug ang bahandi? Talikdan lamang.