Pagsugod ni Archival

Dunay video nga nag-viral sa social media kabahin sa usa ka tawo nga milabay ngadto sa dagat og usa ka sakong puno sa basura didto dapit sa Pasil Fish Port. Gipadala kini ngadto sa account ni Cebu City Mayor Nestor Archival ug mihagit sa mayor nga molihok ug tudloan niya’g leksiyon ang abusado nga lumolupyo sa Barangay Pasil. Isip mayor, angay nga si Archival maninguha gyud kutob sa iyang mahimo aron ang maong tawo mailhan ug mapahamtangan niya’g silot kay kon dili niya kini himoon, yam-iran siya sa mga tawo.

Gidungog si Archival nga kunohay “environmentalist” mao nga bisan ako misalig nga lihokon niya ni aron mosalig pa ang katawhan kaniya, kay duna ra bay mga isyu nga naglambigit og environment, wa siya mohimo’g lakang.

Gidayeg nako si Raquel Arce, ang head sa Cebu City Transportation Office (CCTO), kay abtik kaayo siya nga mitanyag og P10,000 nga ganti ngadto sa makahatag og impormasyon nga mailhan ang maong tawo.

Sigurado ko nga daghan ang makaila sa maong tawo kon makakita sa maong video, sa akto gyud sa paglabay niya sa basura ngadto sa dagat, ug samtang naglakaw siya balik sa iya tingaling balay.

* * *

Ang karsada gihimo aron kaagian sa mga sakyanan, apan kadaghan kita makakita nga kon dunay ipahigayon nga "bilar" alang sa usa ka namatay, sirad-an man ang karsada ug anha sila magbutang og tulda, dayon dunay mag-mahjong.

May miingon nga "public nuisance" kini og dili gyud angay'ng itugot, apan ang uban mahadlok nga sawayon sa mga paryente sa namatay. Apan ang pagsirado gud sa karsada kay anha nila ibutang ang mga tulda, dili na makiangayon. Para nako, sabton nato og gamay nga bisan og maisip kini nga dili tukma, kon wa na gyuy laing lugar nga kahimoan sa pagbilar panahon sa gabii, sagdi na lang ---- apan katunga lang sa karsada nga makaagi pa ang mga sakyanan. Unya, kay ang pagbilar himoon ra man sa gabii, ngadto sa kadlawon, ini'g ka buntag nga wa nay magbilar, hiposon na ang mga tulda, dili kay ipadayon kini pagbutang sulod sa subra pa sa siyam ka adlaw. Tingali kon buhi pa ang tawo nga gihaya, basin og apil sab siya nga dili makagusto niini. Unsaon man sab gud nga ang mga opisyal sa barangay karon pwerteng talawana man kay mahadlok nga di na makadaog.

Eleksiyon na ra ba unya sa Nobiyembre 2, kon mag-estrikto sila basin og yam-iran sa mga botante mao nga mobahag ang ilang ikog ug dili makapatuman sa balaod.