Sen. Estrada napriso

CEBU, Philippines — Subling gidakop sa mga otoridad si Sen. Jinggoy Estrada ug ning tungora dili na siya puydeng makapiyansa. Si Estrada nalutsan og warrant of arrest gikan sa Sandiganbayan Fifth Division sa kasong plunder may labot sa kontrobersiya sa flood control projects.

Si Estrada nag-atubang og kaso may kalabotan sa pasangil nga nakadawat kini og kickback nga moabot og P573 milyones gikan sa flood control projects.

Sa paggawas sa warrant kagahapon, si Estrada mipadayag dayun nga siya motahan sa iyang kaugalingon, apan didto siya nidiretso sa Senado ug didto nipagawas sa iyang pamahayag.

Matud pa niya sa press conference nga iyang gimandoan ang Senate Secretary nga i-hold lang una iyang sweldo samtang giatubang niya ang kaso aron di siya ingnong nagpahimulos sa pundo sa katawhan. Matud niya magpabilin siyang naa sa Senate majority bloc apan dili siya mangayo og Senate custody. "I will not yield to threats. I will not be intimidated. I will not be pressured into surrendering my independence of judgment," matud niya.

 Pipila ka mga majority senators sama nilang Senate President Alan Peter Cayetano ang nibarog tupad ni Estrada samtang namahayag ni sa media, ang uban nila nitulo ang luha. Human sa briefing,  si Estrada gikuyogan nilang Interior Secretary Jonvic Remulla,  Cayetano, Senador Imee Marcos, ug Senador Rodante Marcoleta padung sa Camp Crame sa Quezon City para sa pagproseso sa buhatan sa Criminal Investigation and Detection Group.  Si Estrada tanggungon sa New Quezon City Jail sa Payatas.

Ang kasong plunder dili mapiyansahan kun lig-on ang ebidensiya. Una na siyang nalutsan og warrant sa kasong graft niadtong Mayo 29, apan nakapiyansa siya niini.

Ang pagdili ni Estrada pagpaubos sa kostudiya sa Senado, dakong kalainan sa gibuhat sa  majority bloc paghatag og proteksyon kang Sen. Ronald "Bato" dela Rosa nga nagtago-tago karon gikan sa warrant of arrest sa International Criminal Court.

Apil sa nalutsan og warrant sa kasong graft  kauban ni Estrada mao si kanhi DPWH Manuel Bonoan ug uban pang kanhi mga DPWH officials nga giingong kakunsabo sa kontrobersiya sa flood control projects nga i-arraign karong adlawa, Martes.