Babayeng Top 7 Most Wanted nadakpan
CEBU, Philippines — Nadakpan sa mga operatiba sa Tabuelan Police Station ang usa ka gikonsiderar nga top 7 most wanted person sa provincial level, pinaagi sa warrant of arrest didto sa Purok Santan, Barangay Olivo, Tabuelan, Cebu niadtong Sabado sa hapon Mayo 30, 2026.
Ang operasyon sa kapolisan, pinaagi sa warrant of arrest, gipahigayon sa Tracker Team sa Sawang Calero Police Station 6 nga gipangulohan ni Police Captain Noah Labra Añana ug koordinasyon sa Tabuelan Police Station.
Gisilbi ang warrant of arrest sa top 7 MWP provincial level ni adtong alas 5:00 sa hapon sa Sabado. Giila sa mga awtoridad ang suspetsado nga si alyas “Myka,” 37-anyos, ug residente sa maong barangay.
Ang suspetsado gidakop tungod sa paglapas sa Section 7 ug 15 , Article II sa Akta Republika 9165 o Comprehensive Dangerous Drugs Act of 2002.
Ang maong warrant of arrest giisyu ni Michael Maglasang Mernando Jr., ang Presiding Judge sa Regional Trial Court Branch 8, Dakbayan sa Sugbo, niadtong Mayo 25, 2026, ug walay piyansa nga girekomenda.
Suma pa sa report sa kapolisan, giingon nga ang suspetsado nadakpan na kaniadto sa Philippine Drug Enforcement Agency Regional Office (PDEA-7) niadtong tuig 2021 tungod sa samang kalapasan didto sa General Gines Street, Block 5, Barangay Sawang Calero, Dakbayan sa Sugbo.
Ang maong malampusong operasyon kabahin kini sa mas gipakusgan nga kampanya sa Cebu City Police Office batok sa mga indibidwal nga adunay pending nga warrant of arrest. — Cheny R. Labrador, CNU Intern/IBM (BANAT NEWS)
- Latest
