Ang pagduaw ni Maria Santisima

Mayo 31 pagasaulogon ang pangilin sa Pagduaw ni Maria Santisima ngadto sa iyang ig-agaw nga si Santa Isabel. Apan kay natumong man kini sa Dominggo sa Santisima Trinidad mao nga mas nilabaw ang maong kasaulogan.

Apan dunay atong tampo pamalandong sa sa maong kasaulogan diin gitak-opan usab sa daghanang mga parokya bisan asa sa Pilipinas ang pagsaulog sa Flores de Mayo.

Naandan kini nga kasaulogan natong tanan.  Usa kini ka makahuloganon ug mabulokong kasinatian alang kanatong tanan, bata man o tiguwang.

Ang pagduaw ni Santa Maria magtudlo kanato ning mosunod:

1.  Maayong Balita ang angayan natong bitbiton sa atong pagduaw sa atong mga higala, banay ug ni bisan kinsa.

2. Ang pagduaw usa ka matang sa pagpangalagad sap ag-inambitay.

Si Maria niambit sa kalipay ni Isabel nga talianak niadtong tungora, si Isabel niambit usab sa kalipay nga gidala ni Maria sa sabakan niini.

3. Ang pagkaanaa kun presensiya dako man og kalambigitan sa tawo nga giduaw.

Sa atong pagkasimbahan halayo pa kaayo ang dakong tinguha sa atong Santo Papa nga mamahimong manimaho ang simbahan sa baho sa iyang mga karnero.

Usahay angayan natong angkunon nga kita mismo nga nangandoy nga mamahimong haduol sa atong katawhan ang nahilayo gikan kanila tungod kay wala man nato hatagi og igong gibug-aton ang bili sa pagduaw ug pagpangomusta sa kahimtang sa atong mga panon.