Tinapulan

Mabasol ba ang mga sakop sa minoriya sa Senado sa ilang gihimong walkout atol sa session niadtong Martes?

Aron masabtan atong susihon unsay nahimong sinugdanan nganong nahitabo ang walkout.

Nagsugod ni dihang giduso ni Senador Rodante Marcoleta nga amendahan ang ilang lagda og tugotan sila nga makahimo pagtambong sa session ug makaapil sa pagbotar sa mga importanteng butang nga tukion sa plenaryo pinaagi sa online.

Gisupak ni sa minoriya tungod kay sa ilang tan-aw gitumong ni aron hatagan og pabor si Senador Bato dela Rosa nga karon nagtago-tago tungod kay dunay warrant of arrest gikan sa International Criminal Court (ICC).

Apan bisan wala pay diskusyon ug klarong pagpasabot nganong kinahanglang usbon ang ilang lagda, giduso na ni Senate President Alan Peter Cayetano nga ilang disisyonan ang motion ni Marcoleta pinaagi sa pagboto.

Kini maoy giprotestahan sa minoriya nganong molargo sila sa botasyon nga wala pay diskusyon. Ug ubos sa ilang kaugalingong lagda, ang ingon niini nga mga sugyot kinahanglan una nga moagi sa committee on rules.

Mao ni dugukan sa nahitabong walkout sa Senado.

Samtang dili husto nga paagi sa pagpadayag sa pagsupak ang walkout, apan dunay mga higayon nga kini kinahanglang buhaton aron paghatag og gibug-aton sa inyong baruganan labi pa kun mayoriya magsalig sa ilang numero.

Wala gyuy igong rason nganong itugot nga motambong sa session ang usa ka senador pinaagi sa online.

Nahuman na ang pandemya ug angayang moreport sa session ang tanang mga magbabalaod sa nasud. Ila ning trabaho ug responsibilidad nga motambong sa session.

Ang matag senador nagdawat og sweldo nga di moubos sa P300 mil matag-buwan gikan sa buhis sa katawhan, apil na sa mga yanong trabahante nga matag-adlaw naningkamot nga makatambong sa trabaho taliwa sa kalisod ug kamahal sa gasolina ug pletihan.

Ang mga minimum wage earners kinahanglan gyud nga moadto sa ilang trabahoan bisan mamaylo og pamelete apan ang mga sweldado sa gobyerno yano rang moingon nga mag- online ra sila sa trabaho?

Dili tingali mosugot ang but-an nga mga magbubuhis niining maong sitwasyon? Busa may katungod ang mga sakop sa minoriya sa Senado nga magsilbing tingog sa mga but-an nga magbubuhis aron babagan ang tinapulan nga paagi sa pagpanerbisyo.

Ang tinuod nga motibo sa maong sugyot mao nga masiguro nga magpabilin ang numero sa mayoriya ug padayong makontrolar ang Senado bisan nagtago-tago ang uban nilang membro ug di mahimong motambong og session. Hapin ning daan sa mayoriya tungod kay sa higayon nga dunay laing kudeta sa Senado hayan mahulipan si Cayetano.

Ug labaw sa tanan, preparasyon ni aron siguroon nga magpabilin ang ilang numero sa higayon nga masugdan na ang impeachment trial ni Bise Presidente Sara Duterte.