Wala ka-move on

Human palagpota sa bag-ong mayorya ang grupo nila ni kanhi Senate President Tito Sotto III niadtong Mayo 11, 2026 maingon nato nga ang nahisgotang grupo wala ug dili gayod makadawat nga gipulihan sila sa ilang trono. Hinungdan nga mihimo sila sa pagsuway sa paghulip sa bag-ong presidente sa Senado nga si Alan Peter Cayetano.

Apan napakyas si Senador Sotto sa pag guba sa solido nga 13 ka senador nga pabor ni SP Cayetano. Sa ikaduhang higayon misuway napod sila sa pag-ilog kang Cayetano sa pagka presidente sa Senado ug ning higayona si Senador Sherwin Gachalian na ang ilang pangbato apan pakyas gihapon sila.

Tungod niini, kanunay nga init ang ulo sa mga senador nga nahisakop sa minorya. Kanunay silang emosyonal. Mura na sila og mga bata nga hingaway. Gamay nga bikil mangaway dayon.

Ang gipakita sa minorya timailhan sa ilang pagdumili sa pagdawat sa nahitabo kanila. Dili sila makatuo nga sa usa ka pagpamilok gipakanaug sila sa ilang trono. Sa ilang kasagmuyo, wala gani sila magreklamo sa pagsulod sa mga sakop sa National Bureau of Investigation sa ilang teritoryo ug mibun-og sa sakop sa Office sa Sergeant at arms (OSAA) sa Senado.

Sila pa gani ang mibasol ni SP Cayetano nga mao ang hinungdan sa pagkawagtang sa dignidad sa Senado. Nalimot sila nga ang ilang grupo mao ang nagpaubos ug nagpawagtang sa dignidad ug kredibilidad sa Senado, wala pa mahimong presidente sa Senado si Alan Peter Cayetano.

Ang pagpahigot sa liog ni kanhi SP Sotto sa Malakanyang ug ang pagtabon sa Blue Ribbon Committee nga gipangulohan ni Ping Lacson sa utok sa pangawat sa salapi sa flood control project mao ang nagpawagtang sa dignidad sa Senado.

Ang paghulip ni SP Cayetano isip bagong pangulo sa Senado posible pa gani nga maoy makapabalik sa dignidad ug kredibilidad sa Senado.

Ang kalihokan sa mga senador nga nahisakop sa minorya klaro kaayo nga kamatuoran sa ilang pagdumili sa pagdawat sa ilang pagkawagtang sa trono. Move on na mo oy.

Dawata nalang ninyo ang kamatuoran nga wala na mo sa inyong trono