Listening Spaces ug dili ang Confessional

Mao kini ang nakahatag og igong kagubot ug kalibog kun nganong listening spaces ug dili ang confessionals ang gamiton sa pagahimoong Youth Vigil didto sa Madrid Espaniya.

Unsa may buot ipasabot niini? Nga mamahimong ihiplig na lang ang sakramento sa pagkumpisal? Hinuon dili kita mohatag sa atong hinanaling hukom kalabot ning mga butanga.

Nahimong duso nga pastoral karong tuiga ang simbahan nga maantigong maminaw. Hinuon alang Kanako isip pari matag adlaw ug matag alagad pinaagi sa mga sakramento ang kahigayonan man sa pagpaminaw.

Diha sa paghilog sa masakiton nga himatyon, diha sa usa parokyano nga nibakho sa kumpisalan, diha sa tawo nga nidawat sa panalanging sacramental sa iyang kahimanan sa debosyon ug sa iyang mga pangutana kalabot niini, usa naman ka pagpaminaw.

Ang mga kaslonon panahon sa ilang interview usa naman ka kahigayonan sa pagpaminaw. Ug bisan gani diha sa yanong pakigtagbo sa mga yanong okasyon sa kinabuhi, usa naman ka pagpaminaw.

Kining gidamgo nga usa ka listening church hagbay raman kini nga pangindahay sa atong Ginoo ug sa atong simbahan.

Dili naman tingali kinahanglang komplikadohon ang tanan. Himoon unta kini nga mas masabtan. Alang nako, mahinungdanon kaayo ang presensiya sa simbahan sa mga mahinungdanong yugto sa kinabuhi sa matag matuohon.

Labaw sa tanan, mahimo siyang epektibo nga maminaw kun dili ipalapos sa pikas dunggan ang mensahe nga madunggan. Hinunoa, atong angkunon nga pakyas kita sa makadaghan.

Kun ang mga tawo nasayud ug nibati nga sila atong gihatagan og igong pagtagad nan, sila usab maantigo nga motan-aw ug mosud-ong sa atong kahimtang….