Zarzuela ra ang tanan

Daw gitamparos si Senator Pia Cayetano sa tubag ni Senador Panfilo Lacson sa iyang drama nganong wa gyuy bisan usa gikan sa mga sakop sa minoriya ang nangumusta nila human sa kaguliyang didto sa Senado.

Si Pia naghilak nga mipadangat sa iyang kasagmuyo didto sa hawanan sa Senado tungod kay daw sa wa gyud kuno magpakabana ang iyang ubang kauban.

Bisan nalang kuno sa pagpangumusta wala gyuy bisan usa sa mga sakop sa minoriya ang nakahuna-huna niini.

Apan matud ni Lacson kinsa may maghuna-huna nga nag-ungaw sa piligro ang kinabuhi sa mga sakop sa mayoriya niadtong gabii nga nahitabo ang giingong pangatake didto sa Senado nga makita man sa Facebook Live nga malipayon silang nagsawo og kaon ug nangape samtang nagkinataw-anay? Matud ni Lacson nga ang talan-awon nga ilang nakita pinaagi sa mga hulagway ug video sukwahi sa sitwasyon nga gustong ipintal ni Pia sa ilang kasinatian.

Diretso ug pintok kaayo ang tubag ni Lacson nga kuwang nalang niyang naw-ngon si Pia nga mohunong na sa iyang drama. Kay bisan asa dapit nga angulo tan-awon klarong salida ra ang nahitabo.

Ambot og gitumong ba aron makasibat si Senador Ronald Dela Rosa nga giatngan sa mga ahente sa National Bureau of Investigation (NBI) o aron lawgawon ang pagduso sa articles of impeachment batok ni Bise presidente Sara Duterte niadtong gabhiona. O ba kaha aron pagkuha og simpatiya gikan sa publiko.

Apan nisumbalik sa mayoriya ang ilang salida tungod kay nabisto nga wala gyuy pagpangatake nga nahitabo didto sa Senado.

Nabuking nga ang giingon ni Senate President Alan Peter Cayetano nga “under attack” ang Senado, ila rang mugna tungod kay ang nagpaboto iyang kaugalingong sergeant-at- arm.

Ug tungod kay maglisod man siya’g probar sa iyang pangangkon nga giatake ang senado, labihang hiloma ni Cayetano nga daw murag wa lay nahitabo. Inay mangusog nga imbistigahan ang kaguliyang ug sigurohon nga manubag kinsay responsable sa pagbaboy sa Senado daw bugnaw siya niini. Husto si Senador Risa Hontiveros dihang iyang gisukit ang pamunoan sa Senado nganong daw wala kiniy gihimo.

Lisod tuod mangusog nga imbistigahan ang nahitabo labi pa og nasayod sila sukad pa sa sinugdanan nga zarzuela ra ang tanang nahitabo.