EDITORYAL - Importansiya sa K to 12

Makapila naman ka higayon gipasabot ang bahin sa kamahinungdanon sa K to 12 program sa Department of Education, apan naa ang gihapoy pipila ka hut-ong sa katilingban nga nikontra niini.

Ang maong programa dako na baya og natabang sa mga kabataan karon, ilabi na kadtong gikan sa mga kabus nga pamilyang dili makakayang magpatungha sa ilang mga anak sa kolehiyo.

Ang mga nikontra aning K to 12 wala kaayo makatuhop sa benepisyong makuha gikan ani. Ang uban wala maproblema sa kwarta pagpaeskuyla sa ilang mga anak kay tingali mga adunahan sila.

Pero sa mga pobreng pamilya, unsa may ilang ikapa-eskuyla sa ilang mga anak sa kolehiyo? Sa pagkakaron, daghang mga nakahuman sa K to 12 ang nakatungha sa kolehiyo  tungod kay sila nag-working student. Sila na mismo ang nagbayad sa ilang tuition gikan sa ilang sweldo.

Kini tungod kay ang mga produkto sa K to 12, sagad 18 anyos o 19 anyos ang mga edad ini og human nila sa senior high school. Ang uban sa mga eskuylahan ilabi na sa mga pangpubliko, naay mga strands  ug technical vocational trainings nga tun-an sa mga senior high school, ang uban ani, pang National Certification 1 ug 2 nga mabitbit ang mga bata.

Magamit nila sa pagpangempleyo para makapadayun sa ilang pageskuyla ug matabangan pa ilang mga kabus nga ginikanan.

Sa karaang sistema sa edukasyon nga kutob lang sa fourth year ang high school, kadaghanan sa mga estudyante mogradwar nga nag-edad palang og 16-anyos o 17-anyos.  Walay makuhang vocational trainings nga naay NC II.

Kung pobre ang ginikanan, malagmit ang ilang mga anak dili makapadayun og eskuyla sa kolehiyo sunod tuig inig  graduate nila sa fourth year. Dili sad sila makatabang sa ilang ginikanan kay mga menor de edad pa sila ug dili sila puydeng manarbaho.

Ang resulta, ma-estambay ang mga bata og duha ka tuig samtang gapaabot nga mag 18-anyos para makatrabaho ug makatabang sa mga ginikanan, unya unsa mang trabahoa lang ilang makuha anang high school graduate lang?

Ang pinakapait pa gyud ana, ang mga bata masugamak sa dili maayong dalan, dunay sayong mamabdos o makapamabdos, o ba kaha malambigit sa mga krimen kay wala man silay laing mabuhat.