Term extensions?

Gitug-an ni Lito Banayo, usa ka ilado nga political strategist ang iyang nasayran nga panagtagbo nila ni House Speaker Bodjie Dy ug usa sa iyang deputy sa House, kanhi Senate President Tito Sotto III ug Senate Secretary Dong Mendoza sa usa ka Casino Hotel and Resort nga nag atubang sa Manila Bay. Kining maong Casino Resort and Hotel gihulagway ni Banayo nga bag-ong Sentro sa political gravity sa Pilipinas.

Gihisgotan sa maong meeting ang paghimo sa Kongreso nga usa ka Constituent Assembly aron usbon ang 1987 Philippine Constitution o Batakang Balaud diin ang tumong mao ang paglugway sa termino sa mga kongresista ug mga Senador.

Giingon nga himoon kini human dayon sa State of the Nation Address ni Presidente Bongbong Marcos Jr. karong buwan sa Hulyo. Matud pa nga ang mga Senador nga motapos ang termino karong tuig 2028 adunay lugway nga tulo ka tuig ug sa mga kongresista kinsa magpapili sa 2028 nga bugnong lugaynon.

Wala mosulti si Lito Banayo kinsa ang iyang tinubdan sa kasayoran pero iyang giingon nga kun ugaling manghimakak sila si Bodjie Dy ug Tito Sotto mapugos siya sa pagbulgar sa iyang tinubdan.

Gawas sa pagpugong nga mabulgar ang kamatuoran sa pangawkaw sa pundo sa flood control project ug sa gisalot nga budget sa 2025 national budget, kahadlok nga dili makonbikto sa impeachment court si Bise Presidente Sara Duterte, aduna pa gyod diay laing rason nganong kontrolahon sa Malakanyang ang Senado ug kini ang gibulgar ni Lito Banayo nga paghimo sa kongreso nga Constituent Assembly alang sa term extension.

Ang term extension dili lang kini sa mga kongresista ug mga senador kun dili apil na niini ang term extension ni Presidente Bongbong Marcos Jr.

Like father, like son. Walay kalainan si PBBM sa iyang amahan nga wala pod mokanaug sa pagka Presidente sa nasud. Iyang giusab ang 1935 Constitution ug kay may misupak sa iyang term extension, ang mga supakiro iyang gipadakop ug gipapriso ug nagdeklarar og Martial law gamit ang piki nga pagbanhig sa iyang Minister of National Defense nga si late Juan Ponce Enrile.

Kining panghitabo karon paingon na sa pagsubli sa kasaysayan sa rehiming Marcos aduna lamay gamay nga twist. Beware.