Mga espiya sa China?

Gawas sa seryosong hulga sa panglawas tungod sa mga radioactive materials nga nakaplagan sa mga awtoridad sulod sa compound sa Philippine Sanjia-Steel Corporation didto sa Tagoloan, Misamis Oriental, dako sab ang posibilidad nga nakompromiso ang nasudnong seguridad sa nasud sa operasyon sa maong kompaniya.

Dako ang pagtuo sa Department of National Defense (DND) nga gigamit sab sa China sa pagpangispiya ang maong kompaniya sanglit nahimutang kini duol sa dry dock area sa Philippine Navy. Ang planta sa Sanjia-Steel Corporation nahimutang sulod sa 3,000-hectare nga Phividec Industrial Estate. Ang maong luna iya sa DND.

Dihang gironda sa mga ahente sa Presidential Anti-Organized Crime Commission ang planta niadtong miaging semana, nadakpan ang 69 ka mga Chinese nationals ug usa ka Pilipino nga maoy nagpadagan sa operasyon.

Sa pakisusi nga gihimo sa mga eksperto gikan sa Philippine Nuclear Research Institute (PNRI) ilang nahibaw-an nga dunay mga materyales nga kontaminado sa nuclear nga naghatag og dakong piligro sa mga trabahante ug mga molupyo duol sa planta.

Sa dugang imbistigasyon nasayran nga usa sa mga tag-iya sa kompaniya mao ang negosyante nga si Tony Yang kinsa nadakpan niadtong Septembre 2024 tungod sa iyang kalambigitan sa illegal nga operasyon sa POGO ug sa giingong pag-peke sa iyang pagkatawo.

Si Yang maguwang sa economic adviser ni kanhi presidente Rodrigo Duterte nga si Michael Yang. Kun naglibog mo nganong ang planta nakahimo man sa paggamit sa luna nga gipanag-iya sa DND, ang tubag tungod sa koneksiyon sa managsoong Yang sa Duterte administration.

Busa kun tinuod ang pagduda ni Defense Secretary Gilberto Teodoro Jr. nga ang Sanjia gigamit sab sa pagpangispiya sa China dinhi sa Pilipinas dako og angayang ipasabot ang kanhi administrasyon nganong gitugotan niini nga okupahon ang luna nga iya sa DND sa way pagpanagana nga makompromiso ang nasudnong seguridad.

Sigun ni Teodoro, dako ang posibilidad nga dunay gitagoan ang kompaniya tungod kay labihan kuno kagalanti niini nga manweldo sa iyang mga kawani. Ug ang 69 ka mga Chinese nationals nga nadakpan atol pagpangronda posibling mga ispiya sa China.