Nagsiga nga Kabalaka

Dili lang ang grabe nga kainit sa panahon ang makapaukay sa atong mga singot karon, kondili lakip na ang nag-ung-ong nga hulga sa kangitngit. Sa gipagawas nga report sa NGCP, gibutang sa 'Yellow Alert' ang tibuok Visayas grid.

Ang rason? Pwerteng nipisa na lang sa nahabiling reserba sa kuryente—97 megawatts na lang gikan sa nag-unang suplay. Misaka ang demand tungod sa kainit, apan ang suplay padayon nga nakahiyos.

Kon imong kuwentahon, makapakugang ang kamatuoran. Moabot sa dose ka mga planta ang kalit lang naguba o naka-forced outage karon lang buwana sa Mayo.

Samtang duna pa gyuy siyam ka mga planta nga sukad pa sa tuig 2021—lima ka tuig na ang nakalabay—pabiling guba ug wala pa gyud matandog o maulian! Unsa man diay gihimo sa mga tag-iya niining maong mga planta sulod sa lima ka tuig? Nagpaabot ba sila nga moabot ang ting-init una pa sila makahinumdom sa pag-ayo?

Ania kita sa sitwasyon diin ang mga konsumidor na sab ang gipahimangnoan nga magdaginot, palungon ang mga aircon, ug likayan ang paggamit sa mga heavy appliances gikan sa alas-tres sa hapon hangtod sa alas-nuybe sa gabii. Walay dautan sa pagdaginot, ug isip mga responsable nga lungsuranon, katungdanan nato ang pagtinabangay aron malikayan ang rotational brownout.

Apan ang dakong pangutana: Hangtod kanus-a man mag-antos ang publiko sa kakuwang sa seryosong pangandam sa mga power producers ug sa kagamhanan? Ang kainit sa panahon matag tuig man kining mosantop. Dili kini 'sorpresa' o kalit nga kalamidad; kini usa ka predictable nga sitwasyon.

Samtang gihangyo ang publiko sa pagdaginot ug gipaandar ang Interruptible Load Program (ILP) sa mga dagkong mall ug pabrika, kinahanglang pangitaan og dinalian ug seryosong solusyon ang mga "palyado" nga planta sa kuryente.

Dili makiangayon nga samtang nagsaka ang bayranan sa kuryente, ang serbisyo magpabiling "yellow" ug nag-ung-ong padulong sa "red."

Kinahanglan og dinalian nga aksyon, dili lang pulos pahimangno. Kay kon magpadayon kini, dili lang kay ang atong mga appliances ang mapawong—kondili lakip na ang dagan sa atong ekonomiya ug panginabuhian.