Mora’g lisod makonbikto

Nagsugod na ang Senado sa isip Impeachment Court aron hukman kon angayan ba nga tangtangon sa katungdanan si Vice President Sara Duterte nga gipasanginlang miwaldas sa minilyon ka pesos nga kwarta sa gobiyerno sa ug paghulga sa kinabuhi ni Presidente Bongbong Marcos.

Pulos mga abogado ang 11 ka kongresista nga gitudlong sakop sa House Prosecution Team nga maoy magtinabangay pagpangita’g paagi nga ilang mapakonbikto si Duterte.

Apan sa ako na nga giingon nga ang Impeachment Court nga gilangkoban sa mga senador nga ang uban gani wa masuhito sa balaod, mobotar sila dili base sa merito sa kaso, kondili, mobotar sila kon konbiktohon ba, O i-abswelto si Duterte -- base sa political alliance.

Pagka karon, ang mga senador nga matan-aw nimo nga dili kaalyado sa mga Duterte minoriya lang diha sa Senado, ug ang labing daghan kanila mora’g kaalyado na sa bise presidente.

Aron mapakonbikto nila si Duterte, magkinahanglan og 16 ka senador ang mobotar. Unya kay 12 man karon ka senador ang gitan-aw nga kaalyado na ni Duterte, matan-aw nimo nga yam-iran lang sila ni Sara.

Bisan og mangugat pa ang 11 ka sakop sa House Prosescution Team sa pagbatbat sa mga balaod nga giingong nahimo ni Duterte, unya inigh-botasyon lupig sila sa numero, wa gyud sila’y mahimo.

Wa ta’y mahimo kay mao man kini ang gilatid sa Konstitusyon nga ang hukom sa Senado dili na malalis, ug dili makapanghilabot bisan ang labing taas nga hukmanan sa nasud.

Apan nindot kaayo pamation ang Impeachment Trial kay makakita ka kon unsay labok sa senador nga gibotohan nimo sa miaging eleksiyon, ingon man makita nimo ang labok sa mga kongresista nga maningkamot nga ilang mapataktak sa pwesto si Duterte.

Pero banabana nako, mas nindot gyud kadtong Impeachment Trial nga nagtuki sa kaso ni kanhi Presidente Estrada diin si kanhi Chief Justice Hilario Davide Jr. maoy nagdumala.

Ang nindot unta nga dalion nila paghusay kining kaso ni Duterte kay basin og malaygay kini nga dugay kaayo nato masayran og unsay sangpotan niini nga kaso.

Usbon nako pagpasabot, duha ra’y sangpotan niini, “Konbikto” ug “Abswelto.” Apan kon konbikto man gani ang silot nga ipahamtang, ang Impeachment Court gihatagan og gahum nga dugangan ang silot nga pagkatangtang sa pwesto.

Mahimo nga idugang nga penalty ang Perpetual Disqualification from Holding of a Public Office, nga sa ato pa, ang hingtungdang opisyal dili na gyud makahupot og bisan unsa nga pwesto sa kagamhanan.

Ug mao kini ang gitinguha sa ubang kontra ni Duterte nga dili na siya makadagan pagka presidente sa 2028 Presidential elections.