Kang kinsang interest?

Ambot kanus-a mahigmata ang kadaghanan nga nabotahan sa ilang pagkapanatiko nga way maayong padulngan ang ilang pagsunod-sunod sa ilang mga idolo sa politika sa way pagsusi tinuod ba nga kaayohan sa nasud ang ilang gilantaw o ang personal nilang mga interest.

Atong sugdan pagsusi sa mga panghitabo sa Senado sa miaging semana. Pinaagi sa 13 ka mga senador nga karon maoy naglangkob sa bag-ong mayoriya pinangulohan ni Senador Alan Peter Cayetano, ilang giilog ang liderato sa Senado gikan sa beterano nga si Senador Tito Sotto.

Way kwestiyon sa katakos tungod kay isip usaka abogado, takos kaayo si Cayetano nga mahimong presidente sa Senado. Ang kwestiyonable mao ang motibo. Alang ba gyud sa nasud ang ilang gihimo nga kudeta sa Senado o alang sa personal ug politikal nila nga mga interest? Kun alang sa nasud ang ilang gihimo, asang dapita makabenepisyo ang Pilipinas sa nahitabong kudeta sa Senado? Kaayohan ba sa nasud nga ilisan ang utokan nga si Senador Bam Aquino isip chairman sa Committee on Basic Education ni Senador Robin Padilla?

Kun alang ninyo mas makaayo sa Pilipinas nga ang usa ka gradwado sa Harvard University sama ni Aquino ilisan og high school dropout sama ni Padilla niining panahon nga nag-atubang og dakong hagit ang educational system sa atong nasud, ambot wala na ko masayod og unsay tarong ug dili alang ninyo. Ug ang pagtugyan sa importante nga committee on agriculture ngadto ni Senador Camille Villar, kang kansang pamilya nalambigit sa lapad nga conversion sa mga agricultural land aron himoong subdivision, sa inyong tan-aw makaayo sa nasud o makaayo alang sa ilang personal nga negosyo ug interest? Kun duna may konswelo sa nahitabo, kana mao ang pagkabalik ni Senador Bong Go isip chairman sa committee on health. Sulagma lang sakop siya sa bag-ong mayoriya kay kun dili pa siguradong mahukasan sab siya sa iyang komitiba. Alang nako ang pagbutang og balik kang Go sa committee on health maoy ray bugtong hustong nabuhat sa bag-ong mayoriya so far. Apan di pa hinuon uwahi ang tanan, duna pay panahon aron pamatud-an nila nga alang gyud sa nasud ang ilang gibuhat pinaagi sa pagpakita sa publiko nga patas ug wa silay gidapigan sa umaabot nga impeachment trial ni Bise Presidente Sara Duterte.

Angayang ilang pamatud-ang nga isip mga senator-judges, wa silay laing tumong gawas sa pagtabang mga molutaw ang kamatuoran inay nga motabang aron paglubong niini.