EDITORYAL- Krisis sa kuryente

Nabag-ohan ang mga tawo sa Sugbu ilabi na sa Metro Cebu aning rotational brownouts nga nasinati karong semanaha. Ang National Grid Corporation of the Philippines nipahibalo bahin aning yellow ug red grid alert.

Ang resulta, tag-as nga oras sa blackouts ang nasinati sa mga lugar dinhi sa Sugbu. Apan dili lang ang Visayas ang nakasinati ani, kay hasta ang Luzon nag rotational brownouts sad gikan Mayo 13 hangtud Mayo 14.

Ang hinungdan ani, mao ang pagkaguba sa tulo ka mga dagkong planta hinungdan nga menus ang supply sa kuryente para sa mga konsumidor.

Kaning mga plantaha apil ni sa nagsuplay sa kuryente diha sa Luzon ug sa Visayas, ang resulta, pito ka oras nga rotational blackouts sa 32 ka mga lugar sa Visayas ug tagsa ka oras nga blackouts pud sa siyam ka mga lugar sa Luzon.

Para sa mga yanong Pilipino, kahasol ang dala aning blackouts. Naay mga trabahong naapektohan tungod ani.

Pero dili lang ni mao, kung tan-awon og maayo dili ni simpleng problema, kay nagpakita ni kun unsa ka daling maapektahan ang tanan kun dunay maguba nga planta.

Unsaon nalang kaha kung dunay dagkong panghitabo sama sa dagkong kalamidad sama sa linog, super typhoons o ba kaha giyera? Dali kaayong maparalisar ang mga lugar sa nasud tungod lang ani.

Ang policy group nga Institute for Climate and Sustainable Cities miingon nga kaning pagsalig nato sa pipila ka buok nga mga dagkong planta, giusa nga linya sa fuel facilities ug kritikal ng daan nga transmission corridors , nagpakita sa kahuyang sa estraktura sa enerhiya sa nasud.

Karon palang, kinahanglan nga pangitaan nang daan og pamaagi sa gobiyerno nga dili na kini masubli pa. Tinuod maayo nga dunay inter-connectivity pinaagi sa mga power grids ang nasud, apan mao sad na ang guna nga makaingon sa problema kun dunay mahitabo sa usa.

Kung ang mga lokal nga pangamhanan sa kada rehiyon maningkamot palang makapatukod og kaugalingong independenteng power sources ilabi na ang gikan sa mga renewable energy, dili sila maapektahan kun naay magubang planta sa laing lugar.

Gawas nga masiguradong nay paigong suplay sa kuryente ang lokalidad, makatabang sab sila sa ubang lugar kun kinahanglan.