Makadawat ba og retirement pay ang taxi driver?

Dear Atty, Divine,

Usa ko ka taxi driver sud na sa napulo ka tuig. Sa sunod buwan, mag 60-anyos nako og gusto na unta ko nga mo retire. Ang akong pangutana kon makadawat ba ko og retirement benefits gikan sa akong taxi company kay matud pa sa among company dili daw mi nila regular employees? Daghang salamat. —Leo

Dear Leo,

Basi sa Article 295 sa atong Labor Code kini nagkanayon nga ang usa ka empliyado maconsider nga regular employee kon kini nagperform sa trabaho nga necessary or desirable sa usual business or trade sa company og kon ang employee nagtrabaho na og dili mominus usa ka tuig sa maong company. Busa bisan tuod kon ang mga taxi driver wa magdawat og fix nga sweldo, kondili nagremit lang og boundary sa taxi company apan matud pa sa decision sa korte sa Jardin, et al. v. NLRC, Feb. 23, 2000, naka satisfy gihapon kini sa second test nga payment of wages. Ang mga taxi driver nagperform sab sa activities nga usually necessary and desirable sa ilang usual business or trade sa taxi company busa makonsiderar gyud silang regular employee. Gawas pa ang mga taxi company adunay control sa mga taxi driver kay sila ang mo screen sa mga applicants og sila sab ang modesiplina og motaktak sa mga driver nga makahimo og kalapasan sa ilang mga lagda, sila ang motakda sa oras kanus-a pasudlon og kanus-a ibalik ang taxi, busa na satisfy sab niini ang labing importante nga requirement nga mao ang control test. Buot ipasabot nga kon ang balaod ang basihan, regular ka nga empliyado sa taxi company og entitled ka og retirement pay basi sa Article 302 sa atong Labor Code. Thank you and God Bless. —Atty. Divine

Erratum: Mangayo mi og pasaylo bahin sa napatik nga Legal Corner kagahapon bahin sa retirement pay; ang husto "half-month salary per year of service" ug dili " half-year per year of service." We apologize for the oversight. -- Legal Corner