Kakabus dili lisensya sa pagpahimulos

Usa ka babayeng mabdos og tulo ka buwan ang apil sa upat ka mga babayeng naluwas sa mga operatiba sa National Bureau of Investigation (NBI-CEVRO). Nasikop usab ang usa ka suspek nga giingong bugaw atol sa gipahigayong operasyon sa Barangay Camputhaw, dakbayan sa Sugbo. Nalambigit sila sa pagpamaligya sa ilang dungog ngadto sa mga tawong hangol sa unod. Dili nato malikayan nga mangutana: Unsa na man lang diay kalisod ang dagan sa nasud karon nga bisan ang usa ka inahan nga nagdala og kinabuhi sa iyang sabakan, napugos o gidasig man sa pagbaligya sa iyang kaugalingong dungog? Matud sa suspek nga si Jollie Fundador, ang kalisod sa kinabuhi ang nagtukmod kaniya sa pagpamugaw. Gidugang niya nga ang mga babaye mismo ang niduol kaniya. Apan angay natong hinumdoman ang gipahimug-atan sa NBI: Ang pagpahimus sa kalisod sa usa ka tawo aron makahimo og ilegal nga lakang usa gayod ka matang sa human trafficking.

Ang tinuod nga sad-an dili lang ang bugaw, kondili ang sistema nga nagtugot niining matanga sa pagpangulipon sa modernong panahon. Sa higayon nga ang kakabos himuon natong rason aron itugyan ang atong lawas sa kaalautan, nawala na ang dignidad sa pagkatawo.

Dili usab angay palabyon ang taho nga ang kaipon (live-in partner) sa maong mabdos mao pa ang nag-aghat kaniya nga maningkamot pinaagi sa pagbaligya sa lawas samtang wala pa kini manganak. Kini usa ka dakong tamparos sa konsepto sa pamilya ug panalipod. Imbes nga mahimong taming batok sa kalisod, ang partner pa mismo ang nahimong tulay padulong sa kaalautan. Kini usa ka klaro nga timailhan sa pagpangabuso ug pagkawala sa moralidad. Ang pagpasaka og kasong Large Scale Trafficking in Persons batok sa suspek, nga walay piyansa, usa ka mensahe nga ang balaod wala matulog. Apan ang pagkapriso sa usa ka bugaw dili igo nga solusyon. Kinahanglan ang mas lawom nga interbensiyon gikan sa atong gobyerno—pinaagi sa DSWD ug uban pang ahensya—aron mahatagan og tinuod nga kahigayonan sa panginabuhi kining mga biktima.

Ang mga babayeng naluwas, ilabi na ang mabdos, nagkinahanglan og psychological nga tabang ug dili paghukom gikan sa katilingban. Sila mga biktima sa mapait nga reyalidad. Ang atong tahas mao ang pagsiguro nga dili na sila mobalik sa maong kangitngit pinaagi sa paghatag kanila og dalan padulong sa desente nga kinabuhi. Kini ang tutokan unta sa atong kagamhanan.