Gutom batok balaod

Usa ka masulob-on nga huni sa harmonika ang milanog sulod sa detention facility sa dakbayan sa Sugbo. Kini ang huni ni Ireneo Selma Vidal, 68 anyos, kinsa imbes nga magpahulay na sa iyang pangidaron, nabilanggo hinuon tungod sa pagpanukar sa kadalanan aron lang duna’y ikapakaon sa iyang tres anyos nga apo.Ang iyang sala? Kalapasan sa Anti-Mendicancy Ordinance. Ang iyang rason? Kalisod.

Dura Lex, Sed Lex? Sa panultihon sa Latin, "Ang balaod bisan pait, apan kini ang balaod." Tinuod, duna’y mandato ang Cebu City Anti-Mendicancy Office sa paglimpyo sa kadalanan gikan sa mga makililimos. Apan angay natong pangutan-on: Hain man ang utlanan sa pagpatuman sa balaod ug ang paghatag og konsiderasyon sa tawhanong panginahanglan?

Si Lolo Ireneo wala mangawat. Wala siya mamugos. Igo lang siyang nagpakita sa iyang talento sa selendron sa pamasin nga dunay maluoy ug motunol og gamayng pahalipay. Alang sa usa ka tiguwang nga desperado na tungod sa paghilak sa iyang apo nga gigutom, ang dalan sa Colon ang nahimo niyang entablado.

Isyu sa Pagdagmal. Dili usab nato mahimong palabyon ang pasangil sa tiguwang nga siya gidagmalan sa mga sakop sa Anti-Mendicancy Office niadtong gabii sa Mayo 7. Gipa-imbestigahan na kini ni Executive Director John Lumayag.

Ang pagpatuman sa kahapsay dili kinahanglan nga gamitan og kusog ilabi na sa usa ka tiguwang ug masakiton pa gyud. Kon mapamatud-an, kinsa man karon ang tinuod nga malapason sa balaod—ang tiguwang nga nangita og pagkaon, o ang mga personnel nga wala morespeto sa tawhanong katungod?

Ang pagbalhog ni Lolo Ireneo sa prisohan usa ka temporaryong solusyon sa usa ka lawom nga problema sa katilingban. Kon makagawas na siya, duna na ba’y bugas sa iyang lamesa? Kon dili masulbad ang hinungdan sa iyang kawad-on, mobalik ug mobalik gayod ang sama kaniya sa kadalanan.

Ang dakbayan sa Sugbo naila nga dapit sa mga mapinanggaon ug relihiyoso nga mga tawo. Dili unta nato tugotan nga ang tagingting sa rehas maoy motabon sa tingog sa hustisya ug kalooy alang sa mga labing kabus sa atong katilingban.