Mas Maayo kun Biyaan ko Kamo

Basaha: Jn. 6;5-11

Kabahin sa atong gitinguha mao man ang seguridad. Dili lang sab utang kondili hasta na usab sa atong relasyon.

Dili kita buot mahimulag sa mga tawo nga suod kaayo nato. Kini naglangkob sa atong mga ginikanan ug mga mahal sa kinabuhi nga giisip natong dalangpanan sa atong mga panginahanglan.

Apan ang reyalidad mao man nga ang tanan mahanaw lamang lakip na kita mismo. Lisud kaayo ang mamahimong usa ka independent.

Ang atong Ginoo nagkanayon ngadto sa iyang mga tinun-an nga mas maayo nga sila iyang pagabiyaan kay pinaagi lamang niini moabot ang manlalaban nga mao ang Espiritu Santo ug pinaagi sa maong Espiritu Santo pailhon ang kalibutan sa ilang mga sala nga nahimo.

Ang Dios nagtahud sa atong tawhanong kagawasan. Mao nga dili tanang mga desisyon iyang pagahilabtan. Hinunoa iya kitang gidasig aron makabarog sa atong kaugalingong mga tiil.

Ang Espiritu Santo sa laing bahin magagiya kanato diha sa pagpamalandong.

Iyang initon ang atong mga galamhan aron atong makita ang tinuod nga kinabuhi nga dili kontrolado sa atong mga kahadlok ug mga kabalaka.

Ang kinabuhi nga giniyahan sa lamdag sa maong Espiritu Santo ang kinabuhi sa Simbahan.

Kita mag-ampo:

Umanhi ka O Espiritu Santo, Pun-a sa Kalayo sa imong Gugma Ang mga kasingkasing sa imong mga alagad Ipadala ang imong Espiritu, O mamugna sila ug Bag-ohon mo ang dagway sa Yuta!