Kalibog?

Gipalutaw sa mga kongresista nga nahimotang sila sa alanganin sa ilang pagbotar sa Committee Report sa Committee on Justice nga nag-ingon nga ilang nakita nga adunay probable cause sa impeachment complaint batok kang Bise Presidente Sara Duterte Carpio. Ang pag-yon sa Committee Report sa mayorya sa mga kongresista maoy maghatag og go signal alang sa pagpalabang sa Article of Impeachment batok sa Bise Presidente.

Mahulagway nato nga nahisama sa bibingka ang kahimtang sa mga kongresista nga natunga sa init sa ibabaw ug init sa ilawom.

Giingon sa pipila ka mga kongresista nga kun dili sila mopabor sa pag-impeach sa bise president, maapektohan ang ilang mga proyekto nga anaa sa status nga FLR o For Later Release. Ang FLR makonsiderar nato nga usa ka paagi sa pagpalit og boto ug modernong pangalan sa pork barrel nga gideklarar na sa Korte Suprema nga illegal ug unconstitutional.

Kun ugaling mopabor pod ang mga kongresista sa pag impeach sa bise presidente makatilaw pod sila sa kalagot sa mga dumadapig sa bise presidente ug mga DDS.

Pero sa pagkatinuod gihimo lamang nila kining rason agi og salimbong sa tinuoray nga rason nga mao ang kahadlok nga mawagtangan sila sa kabuhong ug kabusog sa ilang bulsa nga ilang natagamtaman sa kasamtangang liderato sa Ubos Balay Balauranan. Mao kini ang dili gusto nilang buhian.

Kun maghisgot ta og proyekto, programa ug activities sa gobiyerno nakalatid na kini sa National Expenditure Program o NEP nga nakalatid sa General Appropriations Bill nga ipalabang sa Kongreso human maaprobahan sa Presidente ang appropriations bill aron nahimong General Approptiations Act o GAA.

Ang For Later Release nga proyekto anaa sa unprogram  nga budget. Poyde ra kini nga ibaliwala sa mga kongresista kun gusto gyod sila nga mobarog unsay ilang gituohan nga sakto.

Hinumduman sa mga kongresista nga ang ilang trabaho mao ang pagpanday og balaud ug dili ang pagmugna og mga proyekto. Hinuon poyde sila nga magpalabang og balaud nga magmugna og proyekto.

Dinhi dili gyod maglibog ang kongresista.