Alas ni Honeylet

Dihang nag-away silang Honeylet Avanceña sa Agosto sa niaging tuig, gipakaingon ni Atty. Nicholas Kaufman nga dili mahulga ang iyang pagka abogado ni Rodrigo Duterte sa International Criminal Court (ICC). Labi na dihang gidapigan siya ni Bise Presidente Sara Duterte batok sa kabit sa kanhi presidente.

Nipakapin siya og istorya nga nagpataka og pasangil si Honeylet. Nipuno pa gyod nga mas takos si VP Sara, isip abogada, pagpili kinsay takos nga mangabogar sa iyang amahan. Wala mahibawo si Kaufman nga dunay alas ni Honeylet batok niya ug bisan ni VP Sara.

* * *

Niangkon si VP Sara nga siya ang nagpili ni Kaufman human napriso ang iyang amahan. Walay nikuwestiyon sa desisyon kay giisip si Kaufman nga usa sa labing maayo sa ICC. Bugtong kontrobersiya maong mga pangagpas sa kadako sa bayranan.

Pero wala matuman ang mga pasalig ni Kaufman. Wala kakuha og interim release ug napakyas pagkumbinser sa ICC nga wala silay hurisdiksiyon ni Duterte. Maong sayon rang nakumbinser si Duterte pagpangita og mas maayong abogado. Ug wala na maminaw ni VP Sara nga maoy nikontrata sa pilderong si Kaufman.

* * *

Si Honeylet ang gipaminaw ni Duterte. Kay niaging tuig pa nga nagduda ni Kaufman. Nipasangil si Honeylet nga gidid-an siyang Kaufman sa pakigkita ni Duterte kay nasuko sa iyang pakigsulti sa ubang mga abogado sa ICC.

Nipasabot si Kaufman nga dili siya ang nipahamtang sa ban. Kon dili ang ICC kay nakalapas si Honeylet sa mga lagda sa korte. Pero si Duterte mismo wala kasabot nganong gilisud-lisod ang inahan sa iyang kamanghoran.

* * *

Kadako kaha sa kakugang ni Kaufman nga ang kamanghoran nga si Kitty Duterte ang nipahibawo nga gitaktak na siya ug nga duna na silay bag-ong nakuha nga abogado sa kanhi presidente. Mas nakugang pa gyod tingali dihang walay nahimo si VP Sara sa paglugway sa iyang kontrata nga ni-expire niadtong Marso.

Dunay mga pagduda nga gituyo ang pagbanos ni Honeylet sa pagkontrata sa bag-ong abogado aron nga dili ma-apektohan kon ma-freeze ang kuwarta ni VP Sara tungod sa nag-ung-ong nga impeachment trial. Pero mas katuohan ang walay panagana nga pagbisto ni Kaufman kinsay tinuod nga responsable sa iyang pagkawani sa salida.

* * *

[email protected]