Daw bibingka

Tataw nga desperado ang PDP-Laban nga mapugngan ang mga kongresista pagbotar pabor sa impeachment ni Bise Presidente Sara Duterte.

Makita ni sa pamahayag nga giluwatan sa partido nga gipangulohan sa igsuon sa bise presidente nga si Davao City Mayor Baste Duterte kagahapon, usa ka adlaw sa dili pa tukion sa plenaryo sa House of Representatives ang report sa Justice Committee iduso ba o dili ngadto sa Senado alang sa trial ang articles of impeachment.

Nanghulga ang PDP-Laban sa tanang kongresista nga mobotar pabor sa impeachment nga dili na dawaton sa partido bisan kanus-a. Dili sila mahimong mopasilong sa landong sa PDP-Laban ug di mahimong motapon sa umaabot.

Ang maong pamahayag labihan ka arogante nga nagpakita sa kadesperado nga daw sa wala nay laing partido nga mahimong kadangpan ang mga kongresista. Nakaingon ko nga desperado tungod kay sigun sa akong tinubdan sigurado na nga ma-impeach gyud ang bise presidente didto sa House. Matud sa akong kasaligang tinubdan, duna nay 215 ka mga kongresista ang mipasalig nga mobotar og “Yes” aron iduso sa Senado ang articles of impeachment. Wala pay labot niini ang mga Sugboanong kongresista nga, sigun sa akong tinubdan, posibling mayoriya sab ang mobotar pabor.

Gawas nilang Kongresista Sun Shimura sa 4th district ug Karen Garcia sa third district nga una na nga mipahibawo sa ilang baruganan pagsupak sa impeachment, ang ubang mga kongresista sa Sugbo dako og posibilidad nga mobotar og “Yes”.

Kun mahitabo ni, posibling moabot og kapin sa 220 ka mga kongresista ang mosuporta aron ipadala sa Senado ang articles of impeachment. Ang maong gidaghanon sobra kaayo sa 160 ka pirma nga gikinahanglan aron ma impeach ang bise presidente.

Ug dili ka kamahay sa mga kongresista nga mosuporta sa impeachment tungod sa grabe nga pressure gikan sa Malacanang nga dunay sagol panghulga. Sigun sa akong tinubdan, gawas nga dili hatagan og pundo alang sa ilang mga proyekto ang mga kongresista, nabalaka sab sila nga mag-atubang og mga asunto. Way kalainan sa bibingka ang sitwasyon sa atong mga kongresista—kayo sa ubos ug kayo sa ibabaw.