Pabilin kamo diha sa Akong Gugma

Pagpamalandong sa Malangkubong kaayohan

Basaha: Jn. 15;9-11

Kamandoan kini sa atong Ginoo nga lisud kaayo tumanon apan dali ra kaayo bungaton. Kay unsa man gud ang paghigugma? Ang paghigugma dili man lang usa ka pagbati kondili usa ka desisyon nga pagahimoon matag adlaw sa atong kinabuhi.

Usa kini ka tawag apan sa laing bahin usa ka dakong hagit. Tawag sanglit kabubut-on sa Dios nga magpuyo kita diha sa kinabuhi sa gugma ug paghigugma. Hagit tungod kay nagkinahanglan kini sa makanunayong pag-atiman aron molinpang. Matang sa paglipang nga magsugod gyud unta sa atong kaugalingon.

Kini tungod kay dili man kita makahatag ngadto sa uban sa bisan unsa nga wala nato mahupti.

Nga sa ato pa, higugmaon nato ang uban sama sa paghigugma nato sa atong kaugalingon.

Human nato mahimo kining unang rekisitos sa paghigugma, panahon na pud nga ang tanan masayud ug makasaksi sa usa ka katilingban nga naghigugmaay ug ang maong akto nagpamatuod lamang nga ang maong katilingban mga tinun-an sa Dios. Kini tungod kay ang Dios gugma man.

Dili lang kini mahitungod sa paghimo og maayo sa mga daklit nga mga panahon ug higayon. Mahitungod kini sa pagpaambit sa gugma nga malikayan nga ikaw maabusohan ug malamangan. Daghang mga maayong tawo ang malamangan ug maabusohan kay ila mang gitugotan mismo.

Diha sa paghigugma dili lang kini lihok sa usa ka tawo kondili lihok kini sa tanan. Dili paigo ang I love you kondili mas makahuloganon kun anaa ang I love you too.