Dako ang sapi

Gibutyag ni Mayor Nestor Archival nga dako ang kita sa mga organisasyon sa Carbon Public Market kay sa kita sa barangay ug siyudad sa Sugbo gikan sa abang sa mga manindahay sa mga stalls sa Carbon Public Market.

Matud sa mayor nga nagkolekta og tag tulo ka gatos ka pesos (P300) sa matag sakop ang organisasyon kada adlaw. Iyang nadunggan nga ang organisasyon adunay mga 200 ka mga sakop. Sa 200 ka mga sakop sa tag P300 sulod sa 30 ka adlaw sa usa ka buwan ang organisasyon mosapi og P1,800,000 o P21,600,000 ang tuig.

Gawas niini, dugangan nako ang nahibaw-an ni Mayor Archival sa akong nahibaw-an nga panapi sa abangan sa mga lantay nga gipaabangan sa mga organisasyon ngadto sa mga manindahay nga walay puwesto sulod sa edipisyo sa merkado.

Kining maong panapi posible nga mao ang hinungdan sa pagsupak sa organisasyon sa mga manindahay sa merkado sa Carbon sa paghimo niining moderno nga merkado.

Lehitimo ug may basihanan man tuod ang mga organisasyon sa mga manindahay sa Carbon sa ilang pagsupak sa modernisasyon sa Carbon. Pero gihimo lamang nila kini nga salimbong sa tinuoray nga hinungdan nga mao ang ilang panapi matag adlaw nga mikita sila og minilyon.

* * *

Gideklarar sa Malakanyang nga Special Non-Working holiday ang Mayo 6-8 alang sa Tri-Cities nga Cebu, Mabdaue ug Lapu-lapu ug lungsod sa Cordova aron dili mabalda ang kalihokan sa ika 48 nga ASEAN Summit.

Nagdala og good news ug bad news sa mga trabahante ang deklarasyon sa Malakanyang. Good news kay makapahuway ang mga trabahante og tulo ka adlaw. Bad news tungod kay wala silay kuwarta sa tulo ka adlaw kay ang Department of Labor and Employment (DOLE) miklaro nga No work, No pay ang gideklarar nga holiday sa Malakanyang.