EDITORYAL - Ghost riders

Dunay punto si Cebu City Councilor Pastor “Jun” Alcover anang iyang pasidaan bahin anang mga “ghost riders” nga posibleng gipangpuno sa kasamtangang listahan sa mga rehistradong mga namasahero gamit ang mga motor.

Apil sa pasidaan ni Alcover nga posibleng mapolitika ang maong sector kay pagkatinuod pwede gyud kaayong magamit ni para makapamintaha sa mga kaatbang sa politika.

Dili lang gani riders o mga habal-habal, kondili hasta pud ang mga drayber sa mga pamasaheroang sakyanan sama sa jeepneys ug taksi.

Pero samtang dawaton ang iyang pasidaan, kinahanglan na gyud nga subayon og balik kaning maong master lists sa mga drivers nga narehistro sa siyudad.

Kay dako man gyud og purohan nga nausab na ang ilang gidaghanon karon, posibleng napun-an o ba kaha nigamay nalang hinuon sila karon.

Usa sa mga hinungdan nganong posibleng nidaghan ni sila karon tungod kay wala nay laing mapanginabuhian gawas nalang ang pagmasahero.

Pwede sab nga nigamay nalang ni sila karon tungod kay namiya na og pamasahero ang uban ilabi na aning krisis sa petrolyo nga pwerteng mahala.

Ug walay laing nakahibalo o nakaila kun tinuod pa ba nga nagmaneho o namasahero ning mga naa sa listahan kondili ang ilang mga barangay officials.

Kay sila may pirmeng makakita aning mga tawhana kada adlaw. Mao nga importante gyud nga beripikadong habal-habal driver o pasaheroang jeep ang kwalipikado sa ayuda aron dili mausik ang pundo sa siyudad.

Hinuon maayo nalang ning pamaagi sa ayuda sa siyudad kay dili cash o kwarta ang itunol ngadto sa mga benepisaryo kondili fuel cards lang nga maoy ilang ipakita sa mga gasolinahan nga maoy gikuha sa siyudad para mohatag og petrolyo.

Ang tumong sa ayuda mao ang pagtabang. Dili unta mag-agad sa politikanhong baruganan sa usa ka kwalipikadong benepisaryo kung hatagan ba siya o dili sa gikinahanglang ayuda.