Hustisya ba o pamolitika?

Giisip sa uban ang 55-0 nga botos alang sa pagduso sa impeachment batok ni Bise Presidente Sara Duterte nga kadaugan sa "accountability." Apan dili nato malikayan nga mangutana: Kini ba usa ka tiunay nga pagpangita sa hustisya, o usa lamang ka pasundayag sa gahum sa politika?

Gituohan usab kini sa uban nga usa ka kalkulado nga paggamit sa gahum sa Kongreso aron piangan si Sara ug dili na makadagan pa sa piniliay sa tuig 2028.

Sa bisan unsang legal nga proseso, ang labing importante mao ang patas nga higayon sa pagdepensa. Ang dinali-dali nga desisyon—nga gipakita pinaagi sa usa ka "unanimous" o 55-0 nga boto sa komite—naghatag og impresyon nga ang hukom nahimo na sa wala pa hingpit nga mapaminaw ang tanang habig.

Alang sa Committee on Justice nga gihatagan na og kahigayonan ang kampo sa bise presidente apan napakyas sila. Sa tinuod lang, bisan mitambong o wala ang kampo ni Sara mosutoy man gihapon ang 55-0 kay nakasuwat naman kining daan.

Ang nigawas nga numero sa botos nagpakita nang daan sa political alignment inay judicial impartiality sa atong nasud.

Ang kongreso ilado naman daan nga kaalyado sa administrasyon ug kong unsay mando sa taas mao gyud ang masunod gipaagi lang nila kunohay sa proseso aron ingnon apan formality lang ang tanan.

Kong pwede pa lang idiretso nalang nila dayon sa Senado kay mismo ang mga wala makauyon sa besi presidente nagpanikad na nga makita siya nga mahukasan sa sa hingpit sa iyang gahum.

Ang pag-impeach sa usa ka bise presidente nga nakadawat og 32 million votes gikan sa katawhan dili basta-basta nga butang nagdala kini og dakong risgo apil na ang instability sa ekonomiya nga mosangpot sa kagubot sa politika makapa-atras sa mga investors. Polarisasyon sa katawhan, imbes nga magtinabangay sa pag-atubang sa kaisog sa inflation ug kakuwang sa trabaho, ang nasod mas nabahin hinuon tungod sa grabeng pamolitika.

Pagkahuyang sa Institusyon, Kon ang impeachment himuon na lang nga "standard tool" batok sa bisan kinsang dili uyon sa administrasyon, mawad-an og bili ang tinuod nga diwa sa atong Konstitusyon.

Ang pagpanalipod sa atong demokrasya wala magpasabot nga kinahanglan natong uyonan ang matag lakang sa Ubos Balay Balauranan.

Ang usa ka lig-on nga gobiyerno mao kadtong andam mosunod sa ensaktong proseso, bisan kon kini dugay ug lisod.

Sa dili pa hingpit nga iduso kining impeachment sa plenaryo, hunahunaon unta sa atong mga lider: Ang ila bang gihimo alang sa kaayohan sa Pilipinas, o alang lang sa pagseguro sa ilang kaugalingong interest sa umaabot nga eleksiyon?

Dili nato tugotan nga ang "hustisya" mahimong biktima sa dula sa politika.