Balitok ni Duke?
Dunay duha ka Sugboanon nga ex-officio members sa House Justice Committee. Isip deputy speakers, sakop sila sa tanang standing committees. Wala sila igkita ug wala madunggi sa walo ka public hearings nga gihimo sa komitiba sa impeachment complaints batok ni Bise Presidente Sara Duterte.
Ambot nangapil ba sa nangagi nga mga botasyon sa pagpatigbabaw sa mga ebidensiya batok ni VP Sara. Pero atol sa botasyon sa articles of impeachment niadtong Lunes, tungod sa mas dakong atensiyon sa media, nahibaw-an nga usa nila nibotar pabor pero ang ikaduha wala motunga.
* * *
Si Deputy Speaker Raymond Mendoza sa TUCP Partylist suod ni kanhi House Speaker Martin Romualdez. Iyang pag-umangkon ang asawa ni Martin, ang Sugbuanong si Kongresista Yedda Romualdez. Nagpabilin siya sa puwesto kay wala hilabti ni Speaker Bojie Dy ang mga sinaligan ni Romualdez.
Usa si Mendoza sa 55 ka sakop sa komitiba nga nibotar sa articles of impeachment nga gitakdang aprobahan sa plenaryo sa House ug ipadala na sa Senado karong Lunes, Mayo 11. Tingali tungod kay si Romualdez ang nangulo sa impeachment ni VP Sara sa niaging tuig.
* * *
Sama ni Mendoza, deputy speaker si Kongresista Duke Frasco sa ikalimang distrito (pulos sila taga Liloan). Gitangtang siya ni Romualdez sa niaging tuig kay nangambisyon nga mopuli pagpangulo sa House. Pero gibalik sa puwesto karong bag-o pagpalig-on sa suporta sa Visayas bloc para ni Dy.
Wala igkita si Frasco sa botasyon niadtong Lunes. Wala magpadala og representante nga mobotar para niya. Gibakwi na bang iyang suporta sa unang impeachment ni VP Sara sa niaging tuig?
* * *
Si Frasco wala mabantog nga dunay iyang kaugalingong politikanhong kabuot. Gipasanginlan nga mag-agad lang sa bisan unsay isugo sa iyang ugangan nga si kanhi Gobernador Gwen Garcia, pangulo sa partidong One Cebu.
Ni-distansiya na bang mga Garcia sa Malakanyang? Protesta ba kini sa pagkatangtang sa asawa ni Duke ug anak ni Gwen sa Department of Tourism? Pangluod ba ni sa pakigsuod ni Presidente Ferdinand Marcos Jr. ni Gobernador Pam Baricuatro (nga maoy nilubong ni Gwen og taga liog sa niaging eleksiyon)? Nagsugod na ba sa pagbalik og ulog-ulog sa mga Duterte nga gibugal-bugalan ni Gwen sa niaging tuig?
* * *
- Latest
