Kalamboan sa serbisyo medical

Nipahibalo ang Kapitolyo nga mas daghan na karon ang mga doktor nga nadugang sa mga distritong hospital sa lalawigan sa Sugbo ubos sa kasamtangang administrasyon.

Sigun sa taho nga napatik sa The Freeman kagahapon, sa wala pay usa na tuig, nisaka ngadto sa 303 gikan sa 177 ang gidaghanon sa mga doktor nga gi-hire ilalum sa administrasyon ni Gobernadora Pamela Baricuatro.

Ang mga bag-ong doktor sa Kapitolyo atua na-assign sa nagkalainlaing district hospital sa lalawigan. Kini sama sa provincial hospital sa mga dakbayan sa Carcar, Danao ug Bogo, ug ubang kalungsoran.

Maayo kini nga kalamboan. Kini tungod kay dili na unya mogasto pa ang mga molupyo sa kabaryohan pagbiyahi ngadto sa Vicente Sotto Memorial Medical Center sa dakbayan sa Sugbo.

Tungod niini, mas dali na matagad ang mga pasyente sa ilang kaugalingong ospital.

Kini nagpasabot nga mas paspas na ang serbisyo medikal ug mas duol na sa katawhan ang tambal ug konsultasyon.

Dili pa lamang dugay, gipahigayon ang serye sa hiring ug deployment sa mga bag-ong doktor nga ipuwesto sa mga distritong ospital.

Ang dugang mga doktor makatabang usab sa pag-atiman sa mga emerhensiya nga kasagarang magkinahanglan og dali nga aksyon.

Ang kasamtangang administrasyon nipasalig nga padayon ang pagpalig-on sa healthcare system sa probinsiya pinaagi sa pagdugang sa mga doktor ug uban pang medical staff sa mga district hospital.

Kini nagpakita lamang sa seryosong paningkamot sa kasamtangang kagamhanan sa Sugbo nga mapalapdan ang serbisyo medikal ug mapaduol kini sa katawhan sa bisan asang suok sa lalawigan.