Kurtina sa pagpakarong-ingnon

Dili na bag-o ang talan-awon sa matag higayon nga adunay international event sama sa ASEAN Summit, kalit lang nga "manindot" ang palibot.

Apan luyo niining pagpanindot, adunay sakit nga kamatuoran nga makapahilap sa dughan ilabi na sa mga kabus.

Kini ang gitawag nga pagpangurtina sa mga dapit nga maagian sa rota sa ASEAN Summit diin gitabonan og mga decorative tarpaulin ang mga dapit nga gipuy-an sa mga kabus sa Sugbo, Mandaue, ug Lapu-Lapu.

Kini usa ka dako ug klaro nga hipokrisya o pagpakarong-ingnon.

Nganong kinahanglan man natong itago ang reyalidad? Ang pagbutang og "kurtina" sa mga depressed areas susama ra sa pagpanilhig sa hugaw paingon sa ilawom sa banig.

Tuod man, hapsay tan-awon ang agianan sa mga deligado, apan ang baho ug ang kalisod anaa gihapon sa luyo niana.

Ang tumong sa gobiyerno mao ang pagpakita og "world-class" nga imahen.

Apan unsa man ang bili sa nindot nga hulagway kon kini gitukod man sa bakak?

Ang tinuod nga garbo sa usa ka nasod wala makita sa gitas-on sa iyang mga building o kakanindot sa iyang mga kalsada, kondili sa giunsa niini pagtratar ang labing kabus nga sektor sa katilingban.

Unsa ang nawala kanato?

Pinaagi sa pagtabon niining mga lugara, gihikawan nato ang atong kaugalingon og oportunidad. Imbes nga itago, nganong dili man nato ipakita ang tinuod nga sitwasyon?

Kon makita sa mga lider sa ASEAN ang tinuod nga nawong sa kakabos, basin kini pa ang mahimong mitsa aron mas mapalig-on ang mga programa sa tabang ug kooperasyon sa rehiyon.

Ang pag-ila nga adunay problema mao ang unang lakang sa pagsulbad niini. Kon sige lang ta'g panago, mahimo na hinuon kining kultura sa pagpadagad ug pagpakarong-ingnon.

Ang mga nagpuyo luyo nianang mga kurtina dili mga "hugaw" nga angayng itago. Sila mga tawo nga adunay dignidad, mga Sugboanon nga nanginahanglan og pagtagad, dili pagtabon.

Imbes nga mogasto og kwarta sa mga temporaryong dekorasyon ug mga "visual shields," nganong dili man kini gamiton sa mga long-term nga solusyon?

Ang pagtukod og disenteng balay, paghatag og trabaho, ug pagsiguro sa edukasyon mao ang tinuod nga "pagpanindot" sa dakbayan. Ang kamatuoran, bisan unsa pa kini kapait, mas maayo kay sa usa ka nindot nga bakak.