Lanog ang mensahe

Malampuson ang ika-upat nga civilian expedition sa grupong “Atin Ito” didto sa Pagasa Island bisan sa hulga sa mga sakop sa Chinese Coast Guard nga nagsunod-sunod sa barkong ilang gisakyan.

Kagahapon sa sayong buntag nakalighot sab ang grupo nga gipangulohan ni Akbayan Partylist Rep. Dadah Kiram Ismula paingon sa Pag-asa Cay 2 aron iugbok ang bandera sa Pilipinas ibabaw sa maong isla.

Simple apan mahinungdanon ug lanog ang mensahe sa gihimo sa “Atin Ito” ngadto sa China---Pilipinas maoy nanag-iya sa maong isla.

Luwan sa usa ka jet ski maisugong gilatas sa grupo ni Ismula paingon sa Pag-asa Cay 2 aron itanom ang bandera sa Pilipinas.

Butang nga gisaad, apan wa gyud mahimo ni kanhi presidente Rodrigo Duterte nahuman nalang ang iyang unom ka tuig nga termino.

Bisan malampuson ang civilian expedition, apan nag-atubang og dakong hagit ang grupo labi pa sa pagdokumentaryo sa ilang mission.

Segun sa grupo, dili nila magamit ilang mga ekipo sama sa drone nga ginama sa China tungod kay kinahanglan nila ang authentication gikan sa Chinese aviation authority.

Duha ka butang ang nakapahingawa nako sa maong kasinatian. Una, tataw nga pagpanghilabot na sa air space sa Pilipinas ang gihimo sa China.

Ikaduha, makapahingawa ang kadaghan sa mga electronic gadgets gikan sa China nga gigamit ug gibaligya dinhi sa Pilipinas.

Kun nahimo sa China nga mapugngan ang paggamit sa drones sa grupong “Atin Ito”, dili imposible nga ila sab nga makontrolar ang mga electronic gadgets nga gibaligya ug gigamit dinhi sulod sa nasud.

Ug alang nako dako ning hulga sa nasudnong seguridad tungod kay posibling magamit nila kini sa pagpangispiya.

Busa samtang dili pa awahi ang tanan, angayan tingaling molihok na ang atong gobyerno pagbadlong ug pagdili sa mga electronic gadgets gikan sa China nga ibaligya ug gamiton dinhi sa Pilipinas.

Mas mahinungdanon ang nasudnong siguridad niining panahon nga labihan ka puderoso sa China. Ang pagdili sa mga electronic gadgets gikan sa China, gawas nga proteksyon sa atong siguridad, usa sab ka lanong nga protesta sa gihimo sa maong nasud nga pagpangilog og teritoryo bisan kun duna nay arbitral ruling nga nagdeklarar nga ang Pilipinas maoy tag-iya sa West Philippine Sea.