Gihatagan ra'g bubble gum gihatagan ra’g bubble gum

Gisaway sa Kilusang Mayo Uno (KMU) ang Labor Day nga mensahe ni Presidente Marcos, Jr. nga naghingalan sa mga trabahante’ng Pilipino nga maoy “dugokan sa nasud”.  Matud pa sa KMU, wala na’y nahibilin sa mga mamumoo kon dili “bukog ug panit na lang”.   Hinaut nga dili lang pulos paatik ang atong idalit sa mga mamumoo kon dili tinuoray nga kaayohan nga angayan ug sibô sa ilang natampo sa nasud.  Matud pa bitaw nila, “Ni’ng pagpunay lang og pangatik sa gobyerno, sama ra’g gihatagan ang mga mamumoo og bubble gum, pwede nimo kining usapon pero dili pwede’ng tunlon.”  Fezteleern!

Naay nagpaluyo’ng politiko

Gibalibaran sa korte ang petisyon sa mga vendors alang sa pagpahunong sa redevelopment sa Carbon Public Market ingon ang pag-anular sa joint venture agreement (JVA) tali sa Cebu City government ug sa Megawide Construction Corporation.  Mora’g makawang na tingale ang bisan unsang paningkamot aron mapakgang ang redevelopment sa Carbon.  Daw naulahi na ang mga vendors sa pagsalida kay napirmahan na man ang kontrata.  Apan matud pa sa akong amigo, “Dili gihapon molunga ang mga vendors sa pagkwestiyon sa kontrata sa Carbon basta naa pa’y politiko nga magpaluyo ug magpakabana kunohay sa ilang kawsa.”  Muleeng!

“Muslim ko sano”

Ipaubos sa deportation proceedings ang usa ka Chinese human kini nadakpan kay nagpaka-aron ingnon nga usa ka Filipino pinaagi sa paggamit og mga peke nga ID ug dokumento ug pagtiner og expire na ang passport.  Nasakpan ang maong Intsik tungod ra usab sa iyang gihuptang peke nga papeles. Makapahinumdum sa usa ka Bol-anon nga mibiyahe didto sa lugar sa Mindanao diin daghan ang mga rebelde.  Sa dihang milabay sa checkpoint ang iyang gisakyan, nagpatoo siya nga usa siya taga-Mindanao. Busa sa dihang gipangutana siya kon kristiyanos ba siya o muslim, kumpiyansa siyang mitubag nga, “Muslim ko Sano.” Atala lagee!

Gibulit sa make-up

adunay 66 ka pamilya nga sakop sa kapunongan nga Lampara Urban Poor Association ug  nagpuyo luyo sa Mactan Expo sa Lapu-lapu City ang temporaryong gi-relocate didto sa usa ka resort sa Cordova isip kabahin sa preparasyon alang sa ASEAN Leader’s Summit karong Mayo 7-8, 2026.  Giabaga sa dakbayan sa Lapu-lapu ang galastohan sa relokasyon.  Makaayo kini sa mga hingtungdan’g banay apan napakita usab niini ang kakulangon sa mga tukmang programa sa kagamhanan pag-atiman sa informal sektor.  Komento pa sa usa ka kritiko, “Ni’ng gibuhat sa kagamhanan, sama ra’g gibulit niini sa make-up ang nawong sa minatay nga nangluspad na aron lang maangayan tan-awon.”  Pagkatoytoy!

 Fiesta cum ASEAN

Giangkon sa kagamhanan sa dakbayan sa Mandaue nga dakong hagit ang dungan nga pag-host sa ASEAN ingon man ang umaabot nga pista sa dakbayan.  Mipasalig hinoon ang mga opisyal sa dakbayan nga naplastar na ang tanan’g preparasyon.  Dili lalim ang pagpahigayon ni’ng duha ka dagkong kasaulogan apan dili usab mahimong ihikling ang usa ka kalihokan aron palabonon ang usa.  Ni’ng kahimtanga, daw nahisama ang dakbayan sa Mandaue sa commercial sa alcohol nga nagkanayon, “Dili lang pang-fiesta, pang-ASEAN pa.”  Madahaan!