Kun diskontento ang matag usa

Pagpamalandong sa malabong kaayohan

Diha sa natad sa patigayon, usa ka dakong hagit sa naninda o namaligya nga himoong kontento ug malipayon ang iyang mga customer. Kini tungod kay ang customer man ang naghatag og income sa mga negosyante. Mao nga kinahanglang creative gyud ang nagdala sa maong negosyo aron siya malipay ug malipay usab ang mga customers niya.

Kay kon mosulod gani ang pagka diskontento dunay dakong posibilidad nga mobalhin ang maong mga customers ngadto sa laing mga negosyante o mga suppliers. Dili maayo nga mokumpiyansa bisan pa man kun igsuon nimo sila o suod ba nga higala.

Kun ingon ini ang hulagway nga atong nakita diha sa pamatigayon mao usab kini ang atong nakita mismo diha sa atong katilingbanon ug espirituhanong panaw. Ang mga tawo nga wala makasabot sa mga panghitabo sa palibot ug sa mga tawo nga iyang gikahibalag mahimong mopahilayo ug moadto sa mga tawo nga nakasabot nila.

Maingon nga diha sa relihiyon usab dunay mga tawo nga wa kalamdagi sa usa ka organized religion ang modangop na hinuon sa mga relihiyon ug kulto nga mosibo sa ilang mga panginahanglan ug kahilig.

Apan ang buhing matuod nga dili tanan mag-agad lamang kahilig ug personal nga pagsabot. Otherwise mao kini ang magdala og usa ka kinaugalingon nga panaw nga hawa sa panaw sa kadaghanan. Sa laktod nahimo ang usa ka tawo nga deviant gikan sa katilingban.

Tinuod mahimong masinati kining maong scenario diha sa kinabuhi natong mga tawo, busa usa ka dako uyamot nga hagit ug tahas sa mga nagdumala nga himoong mas appealing ug makapadasig sa mga tawo nga nalambigit. Busa kinahanglang maningkamot kita aron mamahimong magmabungahon tinabangan sa grasya sa Dios.