Mga danghag nga driver

Kon danghag ka nga driver, sigurado ka gyud nga maaksidente.

Natumba ang usa ka traditional PUJ atubangan sa opisina namo sa Banat News sa eskina D. Jakosalem ug Manalili Street kay gidam-agan man sa laing PUJ.

Gitan-aw nako pag-ayo sa CCTV footage aron mahibaw-an kon kinsa sa duha ka driver ang nasayop ug nakaingon sa aksidente. Klaro kaayo nga makita sa CCTV.

Ang PUJ nga paingon sa Lahug nga nagsubay sa D. Jakosalem Street milahos gyud pagdagan tabok sa crossing bisan og wa pa mahuman ang Red signal light, ug ang nagsubay sab sa Manalili Street wa usab mohunong bisan og Caution na sa iyang karsada.

Kon wa pa mopaturatoy pagpadagan ang PUJ nga nagsubay sa D. Jakosalem, ug naghuwat lang siya nga mosiga na ang Green light, siguro ko nga way aksidente, ilabi na kon mi-Stop na lang unta ang PUJ nga nagsubay sa Manalili Street.

Dinhi motumaw ang pagpahinumdom nato sa mga driver nga tumana gyud ninyo ang balaod sa trapiko. Kon caution na gani, Stop na lang ug ayaw na pagpugos nga molusot gyud.

Kon naa sab ka sa karsada nga Stop ang signal, unya na padagan pagbalik kon Green na ang signal light. Tungod kay ang ubay-ubay’ng mga karsada karon duna na may CCTV, aw mahibaw-an gyud kon kinsa ang sayop.

    * * *

Nasabot nako nga ang Department of Environment and Natural Resources (DENR) dunay tinguha nga pabuksan pagbalik ang labayanan og mga basura diha sa Barangay Binaliw, Dakbayan sa Sugbo.

Way problema basta siguroa lang nga tumanon gyud ang balaod kabahin sa paghimo’g landfill. Di ba duna may landfill liner, kun baga nga guma nga ihanig sa kinahiladman nga bahin sa landfill?

Ang maayo niana nga sa dili pa tabonan og mga lapok ang liner, ipakita usa kini sa media aron nga maoy mo-witness nga gituman gyud ang balaod.

Wa man gyud hinuon gilatid sa balaod nga kinahanglang duna gyuy media nga magsilbing witness, apan nindot ni kay aron ang media nga motan-aw, maoy makamatuod nga gituman gyud ang lagda.

Ako, kon inyo ko nga imbitaron nga moapil sa motan-aw kon gituman ba gyud ang lagda nga butangan og landfill liner ang kinahiladman nga bahin sa pagahimoong landfill, ikalipay nako ang pagkuyog sa inspection.

Para nako, nindot nga ibalik na ang pag-abli sa Binaliw landfill ug modawat og basura nga ilabay aron masulbad na ang problema sa mga Local Government Units (LGU), apil ang Cebu City.

Sayonan ka nga kon adto molabay’g mga basura sa Aloguinsan, pwerteng dakoa sa budget nga gikinahanglan, ug maayo na lang unta nga magamit kini sa mga proyekto.