Nahuli

Adunay gipuno sa bokabolaryo si Atty. Claire Castro. Iyang gipuno ang pulong nga kanunay na nimong nabati sa komunidad ug sayon ra kaayo nimong sabton ug kini mao ang pulong "nahuli."

Matud pa sa tigpamaba ni Presidente Bongbong Marcos nga si Atty. Castro, ang pulong nahuli usa ka general nga pulong nga ang buot ipasabot niini ‘Stop,’ napahinto ug iyang gipasabot nga sa Czech Republic ang pulong nahuli wala magpasabot nga gidakop.

Ang bokabolaryo ni Atty. Castro kabahin kini sa iyang pagpanalipod ni Presidente Bongbong Marcos Jr. kinsa personal nga mipahibawo pinaagi sa social media nga nahuli na si Zaldy Co didto sa Czech Republic pan dili diay tinuod.

Milanat og pila ka adlaw una pa giklaro sa Malakanyang ang sayop nga balita sa Presidente.

Dinhi dili diay si Zaldy Co ang nahuli kun dili si Presidente Bongbong Marcos Jr. ug si Atty. Claire Castro nga naghatag og dili tinuod nga balita o FAKE NEWS.

Nahuli si PBBM nga nailad sa naghungit kaniya og balita mahitungod sa pagkasikop ni Zaldy Co didto sa Czech Republic nga dili diay tinuod.

Nahuli si Atty. Claire Castro nga maayo mangita og lusot bahalag kiningkoy nga palusot makalusot lang si PBBM.

Dinhi makaingon ta nga wala masayop si PBBM sa pagkuha ni Atty. Claire Castro isip iyang tigpamotbot este tigpamaba diay.

Ang nahuli dili diay si Zaldy Co kun dili si Atty. Claire Castro nga nanalipod ug naningkamot nga makalusot sa gibalita ni Presidente Bongbong Marcos Jr. nga dili tinuod.