Sukod sa palabra de honor

Ambot tinud-on bang Vice Mayor Tomas Osmeña iyang bahad nga moluwat sa katungdanan kun dili ibalik sa orihinal nga rota ang Cebu Bus Rapid Transit (CBRT) gikan sa Bulacao sa habagatan paingon sa Talamban sa amihanan.

Si Osmeña mipadangat sa dako niyang kasagmuyo sa kausaban sa rota sa CBRT tungod kay alang niya dili na ang katawhan maoy giserbisyohan sa proyekto kon dili ang mga tag-iya og dagkong patigayon. Iyang gikwestiyon nganong naapil na sa rota sa CBRT ang mga dagkong mall diha sa South Road Property (SRP) ug sa may Cebu Business Park nga wa man unta ni sa orihinal nga plano. Ang orihinal nga rota gikan sa Bulacao mosubay ra sa Natalio Bacalso paingon sa P. Del Rosario ug moliko subay sa Osmena Boulevard paingon sa Kapitolyo dayon sa Escario lahos sa Talamban. Apan tungod sa kadaghang mikaraw sa proyekto, nausab ang mga rota niini. Sa kasamtangan gilakip na ang Il Corso, SM Seaside ug Ayala sa rota, hinungdan sa kasagmuyo sa bise mayor nga maoy orihinal nga proponent sa proyekto. Dunay sukaranan ang kasagmuyo ni Osmeña tungod kay dayag nga dunay mga patigayon nga nakapabor sa kausaban sa rota.  Ambot gituyo ba o sulagma lang, ang konsensiya nalay mag-igo sa mga responsable. Apan piligrong masugamak si Osmeña sa iyang bahad nga mo-resign kun dili ibalik ang orihinal nga rota. Kini tungod kay mora'g lisod na nga mahitabo ang gusto sa bise mayor sanglit duna nay mga tag-iya og luna nga apektado sa proyekto paingon sa SRP ang nabayran sa gobyerno. Dinhi masukod ang palabra de honor ni Osmeña tungod kay sa akong tan-aw imposible na nga mahibalik ang orihinal nga rota. Bueno, mahimo hinuon niyang bakwion ang iyang gisulti ug mopasabot nga kabahin lang kadto sa iyang paghatag og gibug-aton sa iyang kasagmuyo. Dili man sab hinoon bag-o sa mga politiko nga di motuman sa ilang gisulti.

Nakasabot hinuon ko niya ug makasabot sab ko kun di siya modayon og resign. Human sa kahago atol sa kampanya ug sa gasto aron modaog sa eleksiyon, lisod seryosohon ang sama niini nga bahad gikan sa usa ka politiko.