Han-ay

Gubot kaayo ang kalibotan. Kini tungod kay ang mga nagpuyo niini gubot man pud ang mga hunahuna. Ang mga panghitabo man sa atong palibot nahimo mang nisalamin sa mga panghitabo sulod mismo sa atong mga kaugalingon. Ang tinuod nga panlimbasog anaa man sa sulod mismo nato, ang anaa sa gawas mga hinungaw lamang. Tungod niini nagkinahanglan kita og han-ay.

Nindot hunahunaon nga dunay han-ay apan ang tinguha sa ingon malisud man kab-oton kinit ungod ning mga posibleng hinungdan:

1. Ang tanan buot mopasupot sa iyang kaugalingong pagsabot kun unsa kining han-ay.

2. Dunay uban dili buot mosunod kay alang nila dili sila buot nga kontrolon. Bahala na og gubot ug wala ang kahapsay matuman lamang ang ilang kinaugalingong  kahilig ug tinguha.

3. Ang anaa sa pangatungdanan nga maoy gitahasan sa maong paghan-ay ang dili man buot og gubot mao nga magpakabuta bungol na lamang sa mga kagubot sa palibot.

4. Ang uban walay pagpakabana sa ilang palibot kay alang nila dili nila kini suliran. Padayon gihapon sila sa ilang panaw bahala na ang uban.

5. Ang uban moingon sa kaugalingon: “Nganong magpakabana man kita sa uban nga wala man kitay makuha gikan niini.?”

Apan alang kanako mahinungdanon gyud ang kahan-ay sa kaugalingon ug sa katilingban. Dili sa tanang higayon nga sabton nato ang kalooy ingon nga pagbati kondili ang naluoy ug ang gikaloy-an dunay kaakuhan alang sa katilingbanong han-ay ug kaangayan. Tinuod nga malooy kita sa mga kabus apan usahay adunay uban kanila ang mapahimuslanon usab.